Kardinali Bredi: Letra e Papës, burim përtëritjeje për Kishën irlandeze.
(17.03.2010 RV)Letra baritore e Papës drejtuar besimtarëve të Irlandës, do
të jetë burim i rëndësishëm i përtëritjes për Kishën irlandeze e cila, në këtë çast
të vështirë, është e thirrur për një rifillim të ri e për një epokë të re reforme”.
Këtë theksoi sot Kardinali Bredi, gjatë kremtimit solemn eukaristik, në festën e
Shën Patrikut, në katedralen e Armah. Në homelinë e rastit, Primati irlandez,
i cili këto ditë është kujtuar lidhur me fshehjen e mundshme të një rasti të pedofilisë,
vërtetuar në vitet ’70, u shprehu keqardhjen e tij të thellë të gjithë atyre, që
e ndjejnë veten të tradhtuar nga ndonjë mungesë e tij. “Duke shikuar të kaluarën –
tha – më vjen turp, sepse nuk kam qenë në lartësinë e vlerave, që praktikoj e në të
cilat besoj”. Hirësia e Tij i ftoi besimtarët të frymëzohen nga shembulli i Shën Patrikut,
për të filluar procesin e risimit të Kishës irlandeze. Proces që, së pari, nis nga
‘dëgjimi i sinqertë, në lutje, i Fjalës së Zotit’. Në radhë të dytë - vijoi Kardinali
Bredi - kemi nevojë të dëgjojmë zërin e Shpirtit Shenjt. E ndërsa kërkojnë zërin e
Shpirtit në kohën tonë, besimtarët irlandezë duhet të impenjohen në mënyrë më aktive
në gjirin e Kishës. Së fundi – shtoi – duhet të vijojmë përvujtërisht ta ndjejmë
thellë dhimbjen e shkaktuar prej shpërdorimit të fëmijëve nga ana e disa priftërinjve
dhe rregulltarëve e nga përgjigjja dramatikisht e papërshtatshme, që iu dha në të
kaluarën këtyre shpërdorimeve. Në përfundim Kardinali Bredi vuri në dukje se periudha
e përgatitjes së Kongresit Eukaristik Kombëtar të 2012-tës, do të jetë rast për t’i
pranuar mëkatet sinqerisht, vërtetësisht e pa asnjë kusht.