Komisioni i ligjeve rrëzon amendamentin e PS-së për hapjen e kutive
(16.3.2010 RV)Në Shqipëri i komisioni parlamentar i Ligjeve miratoi sot vetëm
me votat e maxhorancës disa amendamente të propozuara nga deputetët e Partisë Demokratike
që synonin të përqasnin me vendimet e Gjykatës Kushtetutese përmbajtjen e projektligjit
të propozuar nga PS "Për disa shtesa dhe ndryshime në ligjin "Për organizimin dhe
funksionimin e komisioneve hetimore të Kuvendit". Mbledhja e sotme e komisionit,
ku do të shqyrtohej nen për nen p/ligji i socialistëve, nuk arriti të dëgjojë dhe
argumentat e opozitës, e cila që në fillim të saj refuzoi të bëhej pjesë e këtij diskutimi,
pasi u njoh me amendamentet e propozuara nga maxhoranca për disa nene të draftit të
saj. "Ky qëndrim rrëzon në thelb atë që ne kemi kërkuar, mundësinë e trajtimit
si provë të kutive zgjedhore në procesin hetimor parlamentar. Pas kësaj është i pakuptimtë
çdo lloj diskutimi tjetër rreth kësaj inisiative. Ajo që ne kemi thënë gjatë gjithë
kohës u provua, kriza nuk është një krizë juridike, por një krizë politike dhe zgjidhja
e saj mund të vijë vetëm nëse ekziston vullneti politik i lidershipit të PD-së", u
shpreh nënkryetari socialist i komisionit të Ligjeve, deputeti Fatmir Xhafaj, pas
largimit nga mbledhja. Ndërsa, deputeti i maxhorancës, Eduard Halimi, largimin
e opozitës e cilësoi "mungesë vullneti dhe dëshire për të zbatuar dhe implementuar
në projektligjin 'për hetimin parlamentar; të parimeve dhe standarteve kushtetuese,
të përcaktuara në vendimet e Gjykatës Kushtetuese. "Ne për procedurë iu dhamë kohë
deputetëve të PS-së që të komunikojnë me grupin e tyre socialist për të marrë vendimin
e duhur politik dhe teknik", tha Halimi për mediat. Pas largimit të deputetëve
të majtë, komisioni i Ligjeve vijoi diskutimin e amendimeve të propozuara nga maxhoranca,
për disa nene të nismës ligjvënëse të socialistëve. Kështu, u miratua neni
1 i propozuar nga PS-ja, së bashku me ndryshimin e propozuar nga PD, nen sipas të
cilit komisionet hetimore nuk mund të kenë objekt dhe as mund të hetojnë çështjet
e gjykuara nga gjykatat e vendit dhe as të hetojnë çështje, fakte apo kompleks faktesh
për të cilat është regjistruar kallëzim penal në prokurori ose kur ato janë në shqyrtim
gjyqësor. Më pas komisioni i Ligjeve miratoi dhe nenin 2, sipas të cilit komisioni
hetimor do të zgjasë 3 muaj, nga 24 muaj që kishte propozuar PS-ja. Ndërkohë,
maxhoranca rrëzoi nenin 3 të propozuar nga PS, i cili kërkonte shumicë në komisione
edhe për hetime të tjera, ndërkohë që Partia Demokratike propozoi që opozita të ketë
shumicën në komisionin hetimor vetëm për hetimin e zgjedhjeve të 28 Qershorit.
Më pas, deputetët e maxhorancës rrëzuan nenin vendimtar për sa i përket kërkesave
të PS, atë të hapjes së kutive të votimit. Neni 4 i draftit që synonte transparencën
përmes hapjes së kutive, nuk u pranua, pasi sipas maxhorancës, "nuk mund të hetohen
çështjet për të cilat është shprehur gjykata. Ata ranë dakord që PS është e lirë të
hetojë çdo gjë tjetër për zgjedhjet, veç këtyre çështjeve, ka një vendim gjykate.