Sot me 15 mars kalendari Kishtar përkujton Shën Luizës dë Marijak
(15.03.2010 RV)Luiza lindi më 1591 në Ferrier. Kaloi një fëmijëri të trazuar.
Si mbeti jetime nga i ati, pas vitit 1604 iu besua një zonjusheje të varfër, që ka
shumë mundësi të ketë qenë e ëma, e cila e detyroi menjëherë të punonte. U rrit duke
punuar rëndë e duke gjetur të vetmin ngushëllim në Kishë. I lindi kështu dëshira
të bëhej rregulltare. Po familjarët, në kundërshtim me dëshirën e saj, në vitin 1613
e martuan me stallierin e sekretarin e Maria de’ Mediçi, Antonio le Gras. Bisedat
e vazhdueshme me Françeskun e Sales, të cilin e takoi për herë të parë në Paris në
vitin 1618, e ndihmuan Luizën ta duronte vuajtjen e rëndë shpirtërore. Më pas,
në vitin 1624, falë takimit me Vinçencin de’ Paoli, u bë bashkëthemeluese e Institutit
të Bijave të Dashurisë. Pak më vonë, në vitin 1625, pas vdekjes së të shoqit dhe hyrjes
në seminar të të birit, Mikelit, nisi të strehonte në shtëpinë e vet vajzat e para
që dëshironin të viheshin në shërbim të të varfërve, në bashkëpunim me Zonjat e dashurisë.
Ishte bërthama e parë e Kongregatës së re, të cilën Shën Luiza e udhëhoqi deri sa
vdiq, më 15 mars 1660. Luiza de Marijak ishte, pra, një grua me fe të fortë dhe
të gjallë e lidhur me Zotin. Kishte dashuri të madhe ndaj Zojës së Bekuar. Kishte
edhe përshpirtëri të madhe ndaj Shpirtit Shenjt. Shenjtën Trini e paraqet si model
bashkimi për çdo bashkësi rregulltare të motrave. Ajo ndjente dhembje për nevojat
e të afërmit për çka përkujdeset pa kursim. Ishte grua komunikative, me prirje të
jashtëzakonshme për organizim. Me një fjalë, shën Luiza ishte vepër e mrekullueshme
e Zotit.