Masakrat e harruara në verilindje të Republikës Demokratike të Kongos
(15.03.2010 RV)Verilindja e Republikës Demokratike të Kongos vazhdon të përjetojë
valën e vrasjeve, të kryera nga rebelët e së ashtuquajturës “Ushtri e Rezistencës
së Zotit (LRA)”, përgjegjëse për shkatërrimin dhe plaçkitjen e fshatrave të tëra.
Sipas vlerësimeve të OKB-së, së paku 1200 civilë janë masakruar që nga shtatori 2008
deri në qershorin e 2009-ës. Heshtja e mediave dhe pafuqia e autoriteteve qeveritare
janë shpesh korniza e këtyre masakrave, të cilat bëhen nga rebelët ugandezë nën hundën
e 17 mijë helmetkaltërve të Kombeve të Bashkuara. Të dëgjojmë denoncimin e ipeshkvit
të dioqezës së Bokungu-Ikelës, imzot Fridolin Ambongo Besungu, njëkohësisht kryetar
i Komisionit për drejtësi e paqe në Konferencën Ipeshkvnore Kongoleze: Askush
nuk flet, flasin vetëm kur ka ndonjë emergjencë, por problemet ekzistojnë, megjithëse
ka përmirësime të vogla. Sot, në Dungu, njerëzit kthehen në fshatin e tyre. Ata që
kishin ikur, kthehen me ndihmën e ushtarëve kongolezë dhe ugandezë. Por në pjesën
e Doumës, ku është selia e dioqezës, nuk ka ndryshime. Ata që kanë ikur nga shtëpitë
për të shpëtuar nga sulmet e Ushtrisë së Rezistencës së Zotit nuk duan të kthehen,
pasi nuk ka asnjë siguri për ta.