Në predikimin e Krezhmëve, Atë Kantalamesa uroi që Eukaristia, farë e jetës dhe e
vdekjes së Jezusit, t’i shoqërojë meshtarë e laikë gjatë gjithë jetës.
(12.03.2010 RV)Në predikimin e
dytë të Krezhmëve, mbajtur në praninë e Papës e të Kuries Romake, Atë Raniero Kantalamesa
ia kushtoi meditimin figurës së meshtarit dhe dhuratës së Eukaristisë. Misteri meshtarak
– tha predikatari i Shtëpisë papnore, duke folur në Kapelën e ‘Nënës së Shëlbuesit’
të Pallatit Apostolik – i themeluar mbi kumtimin e Ungjillit, merr gjallëri e forcë
nga flijimi i Krishtit. Në se dëshiron të jetë vërtetë në shërbim të Zotit, meshtari
duhet ta flijojë plotësisht vetveten, ashtu si e flijoi vetë Krishti. Meshtaria
e krishterë nuk mund të shpjegohet ndryshe, veçse në vartësi të pjesëmarrjes sakramentore
në meshtarinë e Krishtit. Meshtari në elter nuk përfaqëson vetëm Jezusin “Kryemeshtar”,
por edhe Jezusin ‘Kryeviktimë’. “Flijimi eukaristik i meshtarit dhe
i mbarë Kishës, pa atë të Jezusit, nuk do të ishte as shenjt, as i pëlqyer nga Zotit,
sepse ne jemi krijesa mëkatare. Por edhe flijimi i Jezusit, pa atë të Korpit të tij,
që është Kisha, do të ishte i paplotë e i pamjaftueshëm, jo për ta siguruar shëlbimin,
por për ta marrë atë”. Atë Kantalamesa u ndal, më pas, tek Sakramenti i
Eukaristisë, shenjë konkrete e hirit të Zotit: “Jezusi, kur thotë “Merreni
korpin tim”, na jep jetën e vet konkrete, të jetuarit e tij në kohë, mundimet, gëzimet
e gjithçka që mbushi plot jetën e tij. Duke na thënë: “Merreni, ky është gjaku im”,
na jep vdekjen e tij. Eukaristia është farë e jetës dhe e vdekjes së Jezusit”. T’i
zbatosh këto fjalë në jetën e përditshme, për meshtarin do të thotë të dhurojë kohën,
fuqitë fizike e gjithçka që i paraprin vdekjes, siç janë pendesët e sëmundjet. E gjithë
dita e jo vetëm çasti i kremtimit, është Eukaristi. Eukaristia - shpjegoi Atë Kantalamesa
– është e lidhur ngushtësisht me të gjitha çastet e jetës, e posaçërisht, me punën
e përditshme: “Eukaristia është fryt i punës së njeriut, e jo vetëm
i punës bujqësore, sepse gruri nuk bëhet vetvetiu bukë mbi elter, duhet prodhuar,
duhet mbartur, duhet shndërruar. Atëherë ai që punon, e di se mbi elter arrin fryti
i punës së tij, se djersa e tij shkon në prodhimin, që i dhurohet Zotit, në Eukaristi”.Eukaristia
– përfundoi predikatari i Shtëpisë papnore – është shujtë edhe për të rinjtë, posaçërisht
në botën e sotme, ku sundon manipulimi i trupit, i cili shikohet si mjet dëfrimi e
shfrytëzimi. Meshtari mund e duhet t’u mësojë të rinjve të mos e japin më trupin
e tyre, si ushqim për të shuar epshet. Po si mund të realizohet një mësim i tillë
me të rinjtë? “Duke i ndihmuar ta jetojnë Eukaristinë, duke dhuruar
korpin e tyre së bashku me Jezusin në Meshë. Atëherë do ta kuptojnë ç’mendim deshi
të shprehë Pali, kur tha: lumnojeni Hyjin me trupin tuaj. Kështu trupi nuk bëhet më
mjet kënaqësie, që shitet në treg, por bëhet dhuratë, ofertë: në martesë, mjet i dialogut,
i transmetimit të jetës; ndërsa në jetën e përkushtuar, flijim, dhuratë për vëllezërit.
Ja, pra, kështu e gjithë jeta ndryshon me të vërtetë”.