Vëzhguesi i përhershëm i Vatikanit në OKB mbi çështjen e abuzimeve seksuale ndaj të
miturve
(11-3-2010 RV)“Bashkësia katolike vazhdon në përpjekjet e saj për zgjidhjen
përfundimtare të problemit të abuzimeve seksuale ndaj të miturve”: këto janë fjalët
e imzot Silvano Maria Tomazit, vëzhguesit të përhershëm të Selisë së Shenjtë pranë
OKB-së në Gjenevë. Prelati ndërhyri dje në takimin e përvitshëm mbi të drejtat e fëmijëve,
në kuadrin e sesionit të 13-të të Këshillit të të drejtave njerëzore. “Abuzimet
seksuale ndaj të miturve janë gjithmonë krim i urryer”. Në fillim të ndërhyrjes së
tij, imzot Tomazi citoi fjalët e Papës Benediktit XVI, duke kujtuar se “këtij dënimi
të qartë të dhunës seksuale kundër fëmijëve e të rinjve, Papa ka shtuar edhe përmasën
fetare, duke ripohuar se abuzimi është një mëkat i rëndë, që fyen Zotin dhe dinjitetin
e njeriut”. “Integriteti fizik e psikologjik i të miturve që shkelet ka pasoja shkatërrimtare
- shtoi prelati - Studiuesit kanë treguar se fëmijët e abuzuar reagojnë në mënyra
të ndryshme ndaj dhunës seksuale” e tek ata regjistrohen “mundësi më të mëdha të shtatzënisë
të adoleshenteve, të varësisë nga droga e alkooli”. Prandaj, imzot Tomazi kujtoi
se “në vitet e fundit, priftërinjtë, rregulltarët e punëtorët laikë katolikë, në Vende
të ndryshme, janë akuzuar për abuzime ndaj të miturve e shumë prej tyre janë dënuar”.
“Nuk ka kurrfarë arsyetimi për këto sjellje të turpshme e të dënueshme”, ripohoi
prelati, duke nënvizuar se “mbrojtja prej sulmeve seksuale mbetët në krye të listës
së prioriteteve në të gjitha institucionet kishtare që luftojnë e punojnë për t’i
dhënë fund këtij problemi serioz”. Më tej, vëzhguesi i Selisë së Shenjtë nënvizoi
se “masat konkrete për të siguruar transparencën dhe asistencën e viktimave e të familjarëve
të tyre janë një mënyrë për të lehtësuar dënimin, dhembjen e vuajtjet të shkaktuara
nga abuzimet”. Për këtë, “bashkësia katolike vazhdon në përpjekjet e saj për të zgjidhur
përfundimisht këtë problem”, pohoi imzot Tomazi, duke siguruar që “fajtorët e krimeve
të tilla do të pushohen menjëherë nga ushtrimi i funksioneve të tyre e do të trajtohen
sipas normave ligjore civile dhe të drejtës kishtare kanonike”. Më tej, janë
marrë edhe masa tjera ligjore, për të siguruar që “fëmijët e të rinjtë, në shkolla
e në institucione, të jenë të mbrojtur” e “shumë prej këtyre masave, ligjore apo administrative,
kanë të bëjnë me njohjen dhe ndëshkimin e këtyre abuzimeve”. Pastaj, imzot Tomazi
vuri theksin mbi parandalimin, që sipas tij është “ilaçi më i mirë”, çka do të thotë
që në “edukimin dhe promovimin e kulturës së respektimit të të drejtave njerëzore
e të dinjitetit të çdo fëmije, duket të kujdesemi posaçërisht për zbatimin e metodave
efikase në pranimin e personelit shkollor”. Në fund, prelati sugjeroi që të zbatohen
disa praktika që mund t’i ndihmojnë të miturit ti njohin e njoftojnë për sjelljet
jo korrekte të edukatorëve.