Ministri i Jashtëm i Shqipërisë nis vizitën në Serbi
(11.3.2010 RV)Zv/Kryeministri dhe Ministri i Punëve të Jashtme i Republikës
së Shqipërisë, Ilir Meta, i cili mbërriti sot në mesditë në Beograd për një vizitë
zyrtare dy ditore, do të pritet pasdite në takime të veçanta nga autoritet më të larta
të Republikës së Serbisë. Axhenda e zv/kryeministrit Meta do të nisë në orën
17:30, kur ai do të zhvillojë një takim me Presidentin e Republikës së Serbisë, z.
Boris Tadiç. Në orën 18:00, z. Meta do të takohet me zv/kryeministrin për Integrimin
Evropian, z. Bozhidar Gjeliç dhe në orën 19:00 me zv/kryeministrin dhe Ministrin e
Brendshëm, z. Ivica Daçiç. Sipas axhendës, në orën 19:50, kreu i diplomacisë
së Shqipërisë dhe Ministri i Punëve të Jashtme të Serbisë z. Vuk Jeremiç, do të kenë
një konferencë të përbashkët për shtyp. Referuar axhendës, zv/kryeministri
dhe Ministri i Jashtëm, Ilir Meta do të zhvillojë sot homazhe në memorialin e ish-
kryeministrit të Serbisë, Zoran Gjingjiq, i cilësuar si një politikan demokrat dhe
reformator i shquar, i cili u vra shtatë vjet më parë, në 12 mars. Në qendër
të vizitës, sipas Ministrisë së Jashtme të Shqipërisë, do të jenë çështje të marrëdhënieve
dypalëshe, si edhe të bashkëpunimit rajonal dhe ndërkombëtar. Vizita zyrtare e Zv/Kryeministrit
dhe Ministrit të Punëve të Jashtme z. Meta në Beograd është një tregues i qartë i
prioritetit që politika e jashtme e Shqipërisë i jep zhvillimit dhe forcimit të marrëdhënieve
me vendet e rajonit në kuadër të përshpejtimit të perspektivës evropiane për vendet
tona. Gjatë kësaj vizite pritet të nënshkruhen edhe marrëveshje bashkëpunimi
mes dy vendeve. Z. Meta do të ketë takime dhe me përfaqësues të komunitetit shqiptar
në Serbi. nga ATSH-ja