Benedikti XVI mbi Sakramentin e Pajtimit: u jep zemrave ngushëllimin hyjnor në një
botë që e ka humbur Zotin dhe kuptimin e mëkatit
(11.03.2010 RV)“T’i kthehemi rrëfyestoreve si vend ku kremtohet Sakramenti
i Pajtimit, por edhe si vend ku meshtarët duhet “të banojmë më shumë” në mënyrë që
besimtari të gjejë mëshirën hyjnore, të marrë këshilla e të gjejë ngushëllim, ta ndjejë
se Zoti e do dhe e kupton”. Kështu u shpreh sot paradite Papa Benedikti XVI gjatë
audiencës rezervuar pjesëmarrësve të Kursit mbi Gjykatën e mbrendshme promovuar nga
Pendestaria Apostolike. Papa i ftoi meshtarët e pranishëm që “bukurinë, madhështinë
e mirësinë e Hyjit” t’ia tregojnë njeriut të sotëm, që është i tunduar nga relativizmi
i cili e ndryshk ndërgjegjen.
“Po zbehet përvoja që kemi në Zotin, po humbet
kuptimi i mëkatit.” Ja, ky është realiteti që është aq shumë i përhapur sot nëpër
botë. Por nëse njerëzit ndihmohen në takimin me Zotin si në një “dialog për shpëtimin”
me Atin e Mirë që i do, atëherë kthimi i zemrave i çon drejt një mënyrë jetese të
ndryshme, i bën të heqin dorë nga e keqja. Ndërmjetësuesi e mjeti më i përkryer për
këtë takim janë meshtari dhe Sakramenti i Pajtimit, siç quhet ndryshme sakramenti
i Rrëfimit. Pikërisht mbi këto dy pika, Ati i Shenjtë Benedikti XVI e kishte ndërtuar
fjalimin e sotëm drejtuar specialistëve dhe meshtarëve pjesëmarrës në Kursin e përvitshëm
të Pendestarisë Apostolike mbi Gjykatën e brendshme, të cilët i priti në audiencë.
“Kriza
e Sakramentit të Pendesës, për të cilën flitet shpesh, kërkon mbi të gjitha nga ana
e meshtarëve, përgjegjësi të madhe në edukimin e Popullit të Zotit me kërkesat rrënjësore
të Ungjillit. Në veçanti kërkon prej tyre që t’i kushtohen me mish e shpirt dëgjimit
të rrëfimeve; kërkon që t’a udhëheqin me guxim grigjën, që kjo të mos njësohet me
mentalitetin e kësaj bote, por të dijë të zgjedhë gjëra që shkojnë kundër rrymës së
përgjithshme, duke i shmangur kompromiset.” Janë këto kompromise, tipike për
situatën kulturore, – vuri në dukje Papa Racinger– shënjuar....
“...nga
mendësia hedonistike dhe relativiste që synon ta fshijë Zotin nga horizonti i jetës
sonë, që nuk ndihmon aspak në formimin e një kornize të qartë të vlerave të formimit
bazë, nuk ndihmon në dallimin ndërmjet së keqës e të mirës dhe as në pjekjen e një
ideje të qartë për kuptimin e mëkatit. Nuk duhet të harrojmë, se ka një lloj rrethi
vicioz ndërmjet zbehjes së përvojës që kemi në Zotin dhe humbjes së kuptimit të mëkatit.”
Pikërisht
në antitezë të plotë me këto prirje të ndërgjegjes individuale dhe asaj kolektive
duhet të ngrihet figura e meshtarit, – vijoi më tej Papa Racinger. Shembulli që duhet
të marrin meshtarët është ai i Shën Gjon Maria Vianejt. Prej tij mund të mësojnë besimin
e pashtershëm tek Sakramenti i Pendesës, por mund të mësojnë edhe sesi t’i përforcojnë
disa tipare që janë thelbi i meshtarisë si përshembull: shpirti i uratës, varfëria
ungjilltare, marrëdhënia personale dhe intime me Krishtin e kremtimi i Meshës.” –
nënvizoi mes tjerash Benedikti XVI.