Papa në Engjëllin e Tënzot: Zoti nuk e do të keqen e, në se e lejon vuajtjen, e bën
këtë për një të mirë më të madhe.
(08.03.2010 RV)Pas vizitës në famullinë e Shën Gjonit të Kryqit, Papa u rikthye
në Vatikan ku, në mesditë kremtoi, nga dritarja e studios së tij private, lutjen mariane
të Engjëllit të Tënzot. Duke kujtuar leximet e liturgjisë së djeshme, pohoi se Zoti
është i mirë, nuk e do të keqen e, në se e lejon vuajtjen, kjo do të thotë se e ne
bën për hir të një të mire më të madhe. E ndoqën mijëra shtegtarë, ardhur në Sheshin
e Shën Pjetrit nga mbarë bota për t’u lutur bashkë me Atin e Shenjtë. Në
lutjen e Engjëllit të Tënzot, Papa ofroi pika të reja reflektimi për leximet biblike
të së dielës. Duke komentuar dëftimin hyjnor në kaçubën e ndezur, kujtoi se Hyji e
fton Moisiun të bëhet i vetëdijshëm për padenjësinë e tij. Vërtetë përvoja e Moisiut
është e jashtëzakonshme, por Zoti nuk iu duk vetëm atij; Hyji duket, në mënyra nga
më të ndryshmet, në jetën e secilit prej nesh: “Por, për ta ndjerë praninë
e tij, është e nevojshme t’i afrohemi me respekt të thellë, duke e njohur mirë mjerimin
tonë. Përndryshe nuk mund ta takojmë e të bashkohemi me Të. Siç shkruan Shën Pali
Apostull, edhe kjo ngjarje u tregua për të na kujtuar se Hyji nuk u dëftohet njerëzve
mendjelehtë, përplot me vetveten, por atij që është i varfër e i përvuajtur para Tij”.
Rikujtoi, më pas, ngjarjet dramatike, treguar nga Ungjilli i djeshëm:
vrasjen e disa galileasve me urdhër të Poncit Pilat dhe shembjen e një kulle përmbi
disa kalimtarë. Përballë përfundimit të lehtë për ta konsideruar të keqen si pasojë
e dënimit hyjnor - nënvizoi Papa – Jezusi na rikthen figurën e vërtetë të Zotit,
që është i mirë e nuk mund ta dojë të keqen. Përkundrazi, duke kujtuar se fatkeqësitë
nuk janë pasojë e menjëhershme e fajeve personale të atij që i pëson, i fton të gjithë
t’i lexojnë këto fakte, duke i vendosur në perspektivën e pendimit, të rikthimit
në rrugën e Zotit: “Fatkeqësitë, ngjarjet e kobshme, nuk duhet të zgjojnë
në mendjen tonë kureshtje, e aq më pak, të na shtyjnë të gjejmë fajtorët e pandehur,
por duhet të jenë gjithnjë raste për të reflektuar, për të mos u mbështetur mbi shpresën
e kotë se mund të jetojmë edhe pa Zotin e për të përforcuar, me ndihmën e Tij, zotimin
që të nisim një jetë të re. Përballë mëkatit, Zoti na dëftohet përplot me mëshirë
e nuk ngurron t’u bëjnë thirrje mëkatarëve të largohen nga e keqja, të rriten në
dashurinë e tij e ta ndihmojnë konkretisht të afërmin në nevojë, për të jetuar, kështu,
gëzimin e hirit e për të mos vijuar rrugën drejt vdekjes së amshuar”. “Mundësia
për kthesë – vijoi Papa – kërkon nga ne t’i shikojmë ngjarjet e jetës në perspektivën
e fesë, me syrin e njeriut, që ka frikën e shenjtë të Zotit. Kur shikojmë vuajtje
e kobe, urtia e vërtetë është të mos harrojmë sa e paqëndrueshme është jeta… “ …
e talexojmë historinë njerëzore me sytë e Zotit i cili, duke
dashur gjithnjë vetëm të mirën e bijve të vet, për shkak të planit të pashqyrtueshëm
të dashurisë së tij, nganjëherë lejon të vihen në provën e dhimbjes, për t’u prirë
drejt një të mire edhe më të madhe”. Në përfundim të lutjes së Engjëllit
të Tënzot, Papa iu drejtua shtegtarëve francezë, duke u shprehur afërsinë e tij të
gjithë atyre, që vuajtën për shkak të stuhisë, e cila shkaktoi në Francë me dhjetra
viktima: “Que la Vierge Marie aide toutes les familles… “Virgjëra
Mari i ndihmoftë të gjitha familjet, posaçërisht ata, të cilat kalojnë çaste të vështira,
që të mos e humbasin kurrë besimin në dashurinë e Birit të saj”.