Ministrat e brendshëm të rajonit kërkojnë liberalizimin e vizave për Shqipërinë e
Bonsjen Hercegovinën
(05.3.2010 RV)Progresi në fushën e sigurisë së kufijve, në sigurinë e dokumentave
të identitetit dhe arritjet në luftën kundër kriminalitetit, ishin temë e raportimeve
të ministrave të Brendshëm të Ballkanit Perëndimor, në ditën e dytë të Konferencës
së 7-të Ministrore mbi Bashkëpunimin në Fushën e Sigurisë në Europën Juglindore.
Ministri i Brendshëm i Shqipërisë, Lulzim Basha, në fjalën e tij përmendi si arritje
të rëndësishme shtrirjen dhe funksionimin e sistemit TIMS në të gjitha shërbimet e
Policisë Kufitare dhe të Migracionit, integrimin e këtij sistemi me sistemet e tjera,
zgjerimin e përdorimit të këtij sistemi edhe për regjistrin për të huajt, monitorimin
viziv të pikave të kalimit kufitar, etj. Në përfundim të Konferencës, ministrat
pjesëmarrës nënshkruan një deklaratë të përbashkët, ku i kërkohet Komisionit Europian
përshpejtimi i liberalizimit të vizave për Shqipërinë dhe Bosnje Hercegovinën.
Në deklaratën e nënshkruar nga ministrat e Brendshëm të 5 vendeve pjesëmarrëse në
Konferencë, theksohet progresi i bërë nga Bosnje Hercegovina dhe Shqipëria për përmbushjen
e detyrimeve që rrjedhin nga kërkesat për liberalizimin e vizave. "Duke njohur
progresin e dukshëm të bërë, theksojmë gatishmërinë tonë për të kontribuar në sigurinë
europiane nëpërmjet veprimeve specifike dhe me gjerë, me qëllimin e përbashkët për
të rritur kapacitetet dhe përmirësuar aftësitë për të arritur në nivelin, i cili do
t'i lejonte rajonit të bëhej partner europian për të ofruar siguri për të gjithë shtetasit
e kontinentit", thuhej në deklaratën e lexuar nga ministri i Brendshëm Shqipërisë,
Lulzim Basha. Gjatë konferencës, ministri Basha kërkoi gjithashtu shmangjen
e procedurave burokratike të kalimit kufitar si dhe mundësinë e krijimit të një Shengeni
Ballkanik, në të mirë të qytetarëve, për t'u bërë pjesë e Bashkimit Europian.
Në ditën e dytë të Konferencës, pjesëmarrësit folën për progresin e bërë në vendin
e tyre në fushën e Sigurisë Kufitare gjatë vitit 2009, rishikimin e Progresit për
Sigurinë Kufitare në Europën Juglindore gjatë vitit 2009, si dhe Strategjitë e Implementimit
për vitin 2010-2011. Konferenca u organizua nga Ministria e Brendshme e Shqipërisë,
në bashkëpunim me DCAF (Qendra e Gjenevës për Kontroll Demokratik të Forcave të Armatosura)
me pjesëmarrje të ministrave të Brendshëm të vendeve të rajonit si dhe përfaqësues
të vendeve anëtare të Bashkimit Europian. Konferencën e përshendeti edhe
Kryeministri i vendit, Sali Berisha, i cili theksoi se "siguria e kufijve është një
problem shumë i ndjeshëm për vendet tona, pasi ka të bëjë me sigurinë e jetës së qytetarëve
dhe sigurinë e veprimtarisë së gjithanshme të vendeve tona". Ambasadori i Spanjës
në vendin tonë, në cilësinë e vendit që ka kryesinë e radhës të Bashkimit Evropian,
Manuel Montobio, e cilësoi mbajtjen e kësaj konference një arritje të Ballkanit Perëndimor,
ku në thelb trajtohet bashkëpunimi i këtyre vendeve për të luftuar krimin e organizuar,
trafikun ndërshtetëror. Montobio tha se rajoni ka bërë përpjekje të dukshme
për të minimizuar krimin e organizuar dhe për këtë BE është koshiente, prandaj edhe
dyert e saj do të jenë të hapura për këto shtete. nga ATSH-ja