Ndjeti i lutjes i Papës: ekonomia botërore të jetë e drejtë dhe e barabartë. Reflektim
i drejtorit të Fondacionit “Drejtësi e Solidaritet”
(01.03.2010 RV)“Të lutemi që ekonomia botërore të administrohet sipas kritereve
të drejtësisë e të barazisë, duke marrë parasysh kërkesat e vërteta të popujve, sidomos
të më të varfërve”: ky është ndjeti i lutjes së përgjithshme, që Papa Benedikti XVI
u drejton besimtarëve për muajin e marsit. Ashtu si në “Caritas in Veritate”, Papa
vë theksin mbi njeriun e të drejtat e tij, si paradigmë e vërtetë për çdo përparim
ekonomik. Pikërisht për binomin drejtësi-barazi në marrëdhëniet ekonomike ndërkombëtare,
intervistuam drejtorin e Fondacionit italian “Drejtësi e Solidaritet”, ekonomistin
Rikardo Moro: Mendoj se do të ishte i dobishëm një reflektim rreth temës
së marrëdhënieve, në kuptimin që mund të them se ka drejtësi vetëm në një bashkësi,
ku ekzistojnë marrëdhënie humanizuese. Të vendoset drejtësia do të thotë të krijohen
këto lloj marrëdhëniesh. Është një temë, që lidhet ngushtë me përmasën ekonomike:
tregu është një bashkësi, një kompleks marrëdhëniesh dhe, ekonomia që karakterizohet
nga drejtësia dhe barazia – siç thotë Papa – është një ekonomi ku tregu, ku marrëdhëniet
ekonomike që krijojmë, gjërat që shkëmbejmë, çmimi që paguajmë për punën e bërë janë
marrëdhënie, që kanë për qëllim t’i shërbejnë dinjitetit të njeriut. Në çastin kur
kjo bashkësi marrëdhëniesh ka si synim njohjen, krijimin e dinjitetit të ndërsjelltë,
atëherë mund të flasim për drejtësi e barazi e atëherë mund të kemi një ekonomi, që
është vërtet në shërbim të njeriut. Kur flitet për krizë ekonomike, në këtë
periudhë, mendja shkon menjëherë tek SHBA-të, Evropa… Por ekziston edhe një pjesë
tjetër e njerëzimit, që pothuaj është gjithnjë në krizë, por për të nuk flitet… Kjo
është e vërtetë: llogaritet, sipas të dhënave të Bankës Botërore, se 1 miliard e 300
milion vetë jetojnë me më pak se një dollar në ditë e tre miliard jetojnë me më pak
se dy dollarë në ditë. Secili mund ta imagjinojë vetë se ç’do të thotë të jetosh me
dy dollarë në ditë. Kjo pjesë e planetit vazhdon të jetojë pa arritur ta ndryshojë
situatën; kriza rëndon edhe mbi këtë pjesë të njerëzimit, që jeton edhe për hir të
eksportimeve në Veriun e botës. Kriza ka bërë që ekonomitë të kthehen mbrapsht, të
ulet Prodhimi i Brendshëm Brut, prandaj këto vende, megjithëse nuk kanë asnjë përgjegjësi
për krizën, vuajnë pasojat e saj. Azia, me në krye Kinën, është motorri i
ekonomisë botërore. A ekziston rreziku që modeli i ri i zhvillimit, që po imponohet
në këtë rajon, të mos e ketë në qendër njeriun dhe të drejtat e tij? Unë do
të thosha këtë: nuk është aspak e thënë që Kina të jetë motorri i zhvillimit, siç
kanë qenë në të kaluarën SHBA-të, apo Gjermania në panoramën evropiane. Është sigurisht
e vërtetë se zhvillimi kinez zgjon shumë dyshime, pasi kemi shumë dhunime të të drejtave:
dhunime të ligjit mbi punën, të të drejtave të punëtorëve… Mendoj se dalja nga kriza
mund të imagjinohet vetëm me marrjen e përgjegjësisë nga të gjithë, 360°. Nuk mjafton
t’ia lemë iniciativën tregut. Tregu nuk është diçka që ekziston si i pavarur, tregu
bëhet nga persona e kërkon prononcime etike!