Imzot Nikë Prela, ipeshkëv i Kosovës, në 14-vjetorin e vdekjes
(25.2.2010 RV)Duke shfletuar kalendarin, sot më 25 shkurt përkujtojmë 14 vjetorin
e vdekjes së ipeshkvi të Kosovës, imzot Nikë Prelës (1918-1996).
Plaku i Kosovës, siç quhen me dashuri e respekt nga kosovarët, imzot Prela
lindi në Kotorr të Malit të Zi më 3 qershor 1918. Ndoqi rrugën e meshtarisë, që e
çoi në detyrën e lartë të ipeshkvit të dioqezës së lashtë shqiptare të Shkup-Prizrenit,
bari i së cilës ishte qysh nga viti 1970 deri më 1996. Jetoi me Zotin
e për Zotin, me popullin e për popullin, duke shkrirë të gjitha energjitë e veta për
të ndriçuar me dritën e Ungjillit jetën e përditshme. Si meshtar, punoi me të gjitha
forcat, me fjalë e me vepra për të kumtuar Ungjillin e Krishtit; si ipeshkëv, tregoi
kujdes të veçantë për thirrjet meshtarake dhe talentet e reja, duke i hapur rrugën
lulëzimit të veprimtarisë fetare-kulturore-atdhetare në Kosovë. Iu vu ai vetë punës
dhe botoi një sërë veprash, ndërmjet të cilave, Fjalorin Biblik. Si atdhedashës,
të cilit i dhimbsej vendi e populli i vet, imzot Nikë Prela trokiti portë më portë
në zyrat e larta të institucioneve e Shteteve kudo nëpër botë, për të mbrojtur me
shkopin e bariut grigjën që i qe besuar, e cila qe e rrethuar nga ujqërit e uritur.
Dha kështu një kontribut të shquar në ndërkombëtarizimin e çështjes shqiptare, veçmas
të Kosovës. Duke folur për historinë dhe realitetin e shqiptarëve, Imzot
Nikë Prela shpesh thoshte : “Populli shqiptar ende nuk ka dalur në skenë, sepse me
shekuj ka qenë i ndrydhur dhe ka vuajtur shumë. Ky “kapital” e “thesar” flijimi dhe
gjaku na ka dhuruar personalitete si Gjergjj Kastriotin – Skenderbeu dhe Nënë Tereza.
E për përparimin dhe të mirën e popullit e të vendit, imzot Nikë Prela ripohonte
binomin e të krishterëve shqiptarë “Për Fe e Atdhe” duke siguruar mbështetjen e kontributin
e Kishës katolike. Me një rast në dhjetor të vitit 1989 mes tjerash imzot Prela pohonte:
“Kisha jonë është dhe do të jetë gjithmonë me popullin e nëpërkëmbur. Pa popull s’
do ta kemi as Kishën. Çdo shqiptar është vëllai apo motra ime… Unë në popullin tim
shqiptar e gjeta vetveten, gjeta mundësinë t’i shërbejë Zotit dhe popullit sipas parimit
të ipeshkvin të madh shqiptar, Imzot Pjetër Bogdanit: “Fati i popullit tim është fati
im!…”. Me rastin e vdekjes së Imzot Nikë Prelës (25 shkurt 1996), Presidenti
i Kosovës, dr. Ibrahim Rugova tha: “Shembëlltyra e ndritshme e ipeshkvit Prela do
të mbetet gjithmonë në kujtesën historike të Kosovës, kurse vepra e tij gjithmonë
e gjallë që frymon brenda nesh”. Me pak fjalë imzot Nikë Preal qe figurë e ndritur
fetare e atdhetare, një jetë në shërbim të Zotit e të popullit. Mbi figurën,
veprën e trashëgimin që imzot Nikë Prelës i la Kosovës, të dëgjojmë don Lush Gjergjin,
Vikarin e Kishës së Kosovës ...