Papa takon në Vatikan kryeministrin e Libanit, Saad Haririn. Bashkëjetesa e feve dëshmi
e rëndësishme për paqen
(20.2.2010)"Shembulli i bashkëjetesës ndërmjet bashkësive të ndryshme fetare që ka
Libani, është një ‘mesazh’ për Rajonin e lindjes së mesme dhe për mbarë botën”. Kështu
tha mes tjerash Papa Benedikti XVI në fjalimin drejtuar kryeministrit të Libanit,
Saad Hariri, të cilin e priti në audiencë sot paradite në Vatikan, “ në një takim
të përzemërt”. Pas takimit me Atin e Shenjtë Jozef Racinger, kryeministri i Libanit
u takua edhe me Sekretarin e Shtetit të Selisë së Shenjtë, kardinalin Bertone dhe
sekretarin për Marrëdhëniet me Shtetet kryeipeshkvin imzot Mamberti. “Gjatë bisedimeve
u fol mbi situatën në Liban”, duke nënvizuar “nevojën e gjetjes së një zgjidhjeje
të drejtë e globale për konfliktet që po e mundojnë Rajonin e përmendur, po kështu
u theksua rëndësia e dialogut ndërkulturor e të atij ndërfetar për të promovuar paqen
e drejtësinë”. “Në këtë perspektivë - pohon deklarata e Selisë së Shenjtë - nuk ka
munguar edhe përmendja e Asamblesë e ardhshme e Veçantë e Sinodit të Ipeshkvijve për
Lindjen e Mesme”. Së fundit, “u përkujtua rëndësia e pranisë dhe e veprimtarisë së
besimtarëve të krishterë në Liban, dhe u shpreh vlerësimi i sinqertë për kontributin
që Kisha Katolike ofron për të mirën e mbarë shoqërisë, në mënyrë të posaçme, përmes
institucioneve edukative, shëndetësore e humanitare”.