Ashtu si Krishti, meshtari duhet ta ketë zemrën të rrënjosur në Zotin: takimi i Papës
me priftat famullitarë të dioqezës së Romës.
Të jetosh në bashkim me Krishtin, duke iu përgjigjur plotësisht vullnetit të Zotit
për të dashur të afërmin pa asnjë kusht: është ky një nga meditimet e shumta, që burojnë
prej Lectio divina, mbajtur të enjten e kaluar nga Papa, në takimin me priftat famullitarë
të dioqezës së tij të Romës, mbledhur në Vatikan, për takimin e tyre tradicional të
Kohës së Krezhmëve. Në Lectio divina, Papa u përqëndrua kryesisht tek Letra drejtuar
Hebrenjve e, duke u mbështeur tek ajo, theksoi pasojat praktike të meshtarisë mbretërore
të Krishtit mbi jetën e çdo meshtari. Ishte një ngjarje vërtetë e ngarkuar me pika
reflektimi, tek të cilat po rikthehemi përsëri sot. Për të qenë vërtetë njeri i
Zotit, meshtari duhet ta njohë Hyjin nga afër, duhet të jetojë në bashkim me Krishtin.
Prandaj Benedikti XVI i ftoi të gjithë meshtarët të jenë ndërmjetës, ta çojnë njeriun
tek Zoti, t’i prijnë drejt shëlbimit. Por – kujtoi Ati i Shenjtë – për ta bërë këtë,
duhet ta lëmë Zotin të na marrë për dore. E kështu, dorë për dorë, të hyjmë në misterin
e tij të dashurisë: “Qenia jonë, jeta jonë, zemra jonë, duhet të ngulen në
Zotin deri në atë pikë, sa të mos mund të shkulen më; realizohet, kështu, e forcohet
ditë për ditë, edhe me lutje të shkurtëra, rilidhja me Zotin e ne bëhemi njerëz të
Zotit, që jetojnë me Hyjin, që mund t’i flasin Hyjit, që udhëhiqen nga Hyji”. Meshtari,
ashtu si Krishti – tha Papa - është i thirrur të hyjë në thelb të mjerimit njerëzor,
të marrë mbi vete vuajtjet e njerëzve, që i janë besuar. E më pas vuri theksin tek
humanizmi i vërtetë i Krishtit: “Sigurisht zemra e Tij është gjithnjë e
ngulur në Zotin, shikon vetëm Zotin, është përherë në bisedë intime me Zotin, por
njëkohësisht mbart mbi vete gjithë qenien njerëzore; gjithë vuajtja njerëzore hyn
në mundimet e Tij, në sa u flet njerëzve e shikon se janë tejet të vegjël e të mjerë,
si grìgjë pa bari”. Këtë vuajtje – shtoi Papa – e shikojmë në lotët e Krishtit,
në ankthin e Gjetsemanit, në britmëm më rrëqethëse, që dëgjoi ndonjë herë bota, Atë
të Zotit, që vdiste mbi Kryq. Gjithë kjo vuajtje – vijoi Ati i Shenjtë – nuk është
thjeshtë pjesë e misionit të tij. Në të vërtetë pikërisht kështu Krishti flijon vetveten,
bën punën e meshtarit: “Themi me të drejtë se Jezusi nuk i dhuroi
Hyjit ndonjë send, por i dhuroi vetveten, e ky dhurim i vetvetes realizohet pikërisht
përmes dhembshurisë, e cila shndërrohet në lutjen e në britmën e vuajtjes së mbarë
botës, drejtuar Atit”. Në këtë kuptim - vijoi Papa – gjithë dhimbja jonë
e gjithë vuajtja e kësaj bote, aq e largët nga Zoti, është gjest meshtarak, është
dhurim. Më pas Ati i Shenjtë vuri theksin tek përkimi i plotë me vullnetin e Hyjit.
Një bindje, që përfaqëson të vërtetën mbi qenien e meshtarit e që është liri e vërtetë: “Jezusi,
duke e mbartur njeriun, qenien njeri, në vetvete e me vetveten, në përkim me Hyjin,
domethënë, në bindjen e përkryer e, prej këndej, në njëjtësimin e dy vullneteve, na
shpërbleu e shpërblimi është gjithnjë proces, përmes të cilit vullneti njerëzor udhëhiqet
drejt bashkimit me vullnetin hyjnor”. Në Lectio-n e tij, Papa reflektoi
edhe për figurën meshtarake të Melkisedekut. Me të - vërejti – pagani hyn në Besëlidhjen
e Vjetër, pra, në rrugën drejt Krishtit: “Kjo do të thotë se Krishti është
risi absolute e Hyjit, e në të njëjtën kohë, i pranishëm në gjithë historinë dhe,
përmes historisë, me Jezusin takohet jo vetëm historia e popullit të zgjedhur, në
të cilën zbulohet misteri i Krishtit, por ky mister përgatitet edhe nga paganizmi,
nëpër të cilin përshkohen rrugët drejt Krishtit, që mbart mbi vetvete gjithçka”.