Liria fetare në Algjeri: rritet shqetësimi i të krishterëve.
(18.02.2010 RV)Rritet shqetësimi i bashkësive të krishtera në Algjeri për lirinë
fetare. Për këtë u bisedua gjatë një kuvendi zhvilluar kohët e fundit në kryeqytetin
Algjèri me pjesëmarrjen e shumë përfaqësuesve fetarë dhe politikë. Në qendër të
takimit ishte ligji mbi kultet featere që ka hyrë në fuqi në vitin 2006 sipas të cilit,
fetë që nuk janë islamike duhet t’i kremtojnë ritet e veta në hapësira që njihen zyrtarisht.
Pikërisht për shkak të këtij ligji në vitin 2007 u arrestua një meshtar francez sepse
kishte zhvilluar një takim me të rinj emigrantë nga zona subsahariane. Sidoqoftë sqarimi
i ministrit të Punëve fetare Bubdallah Glamallah se Algjeria i garanton të gjitha
bashkësive fetare ushtrimin e lirë të fesë në vendet e caktuara për këtë punë sipas
normave të ligjit të 2006, duket se nuk i ka qetësuar aspak të krishterët. Ata janë
të shqetësuar veçanërisht tani pas një sulmi kundër një kishe protestante, e cila
u plaçkit dhe u dogj. Të krishterët në Algjeri, katolikë e protestantë së bashku përbëjnë
më pak se 1 përqind të popullit algjerian, 99 përqind e të cilit janë myslimanë. Po
çfarë parashikon ligji i vitit 2006? Të dëgjojmë kryeipeshkvin e Algjerisë imzot
Galeb Bader:
Përgjigje: Ky
ligj na detyron të mbyllemi në kishat tona. Nuk kemi liri të jetojmë normalisht dhe
t’i zhvillojmë lirisht kremtimet tona. Qysh më përpara 2006 e ushtronim kultin tonë
pa ndonjë ligj, dhe pa pasur ndonjë shkelje nga ana e kishës. Sidoqoftë nuk duam të
jetojmë nën kërcënimin, fjala vjen, se një grup të rinjsh që dalin e ndalen për t’u
lutur nën një pemë, nuk duam pra që kjo gjë të quhet krim! Përveç tjerash ky ligj
i 2006-ës ka të bëjë edhe me ndërtimin e kishave që mund të kryhet vetëm me autorizimin
e autoriteteve algjeriane. Kjo, në vetvete nuk është diçka e rëndë por mund të kalojnë
vite e vite pa marrë një përgjigje e atëherë kjo gjë bëhet problematike.