Benedikti XVI në audiencën e së Mërkurës së Përhime: pendesë do të thotë të shkosh
kundër rrymës e të shndërrohesh nga dashuria e Krishtit.
(17.02.2010 RV)Periudha krezhmore duhet të jetë rast i përshtatshëm për t’u
kthyer në rrugën e Zotit e për të shkuar kundër rrymës: kjo është porosia, që u dha
Benedikti XVI besimtarëve, mbledhur në Sallën e Palit VI për audiencën e përgjithshme
të së Mërkurës së Përhime. Papa nënvizoi se në këtë periudhë të fortë të vitit kishtar,
i krishteri është i thirrur të lutet e të pendohet me gjithë zemër, duke u shndërruar,
kështu, nga misteri i Pashkëve të Krishtit.
“Pendohuni e besojini Ungjillit!
Në fillim të rrugës krezhmore, Benedikti XVI i ftoi besimtarët ta kuptojnë të renë
e jashtëzakonshme, që buron nga thirrja për pendesë. Kjo thirrje – nënvizoi Papa –
nxjerr në shesh dhe denoncon cektësinë, që karakterizon tepër shpesh mënyrën tonë
të jetesës. Papa vërejti se të pendohesh do të thotë të ndërrosh rrugën e jetës. Jo
duke bërë ndreqje të vogla, por kthesë të madhe, për të hyrë në një rrugë të re: “Të
bësh kthesë, do të thotë të shkosh kundër rrymës, atje ku rryma dhe stili i jetës
sipërfaqësore, jokoherente, të gënjshtërt, na heq zvarrë, na sundon e na bën skllevër
të së keqes ose të burgosur të mediokritetit moral. Ndërsa, kur bëjmë kthesë, kur
pendohemi, synojmë majat e jetës së krishterë, ia besojmë veten Ungjillit të gjallë
e personal, që është Krishti Jezus”. Pra mund të themi se Krishti është caku
i fundit e kuptimi më i thellë i kthesës shpirtërore. Është Ai rruga, në të cilën
të gjithë janë të thirrur të ecin në jetë, të ndriçuar nga drita e tij. Në këtë mënyrë
– vërejti Papa – kthimi në rrugën e Zotit tregon fytyrën më të shkëlqyer e më mahnitëse: “Nuk është vendim i thjeshtë moral, që korrigjon sjelljen tonë në jetë, por zgjedhje
e rrugës së fesë, që na tërheq plotësisht në bashkimin e thellë me njeriun e gjallë
e konkret, Jezusin. Të bësh kthesë e t’i besosh Ungjillit, nuk janë dy gjëra të ndryshme,
që i ngjajnë në një farë mënyre njëra-tjetrës, por e njëjta gjë, shprehin të njëjtin
realitet”. Pendesa, kthimi në rrugën e Zotit, është pohimi i plotë i atij,
që e lëshon plotësisht jetën e vet në dorë të HYjit, duke iu përgjigjur lirisht thirrjes
së Krishtit, që ia dhuron i pari njeriut veteveten si rrugë, e vërtetë, jetë, si i
vetmi që mund ta çlirojë e ta shpëtojë. Veç të tjerash – kujtoi Papa – thirrja për
të bërë kthesë, për t’i besuar Ungjillit, nuk ndjehet vetëm në fillim të jetës së
krishterë, por na shoqëron hap pas hapi. Çdo ditë – pohoi Ati i Shenjtë – është çast
i përshtatshëm, çast hiri, sepse çdo ditë na nxit t’ia dorëzojmë vetveten Jezusit
e të kemi besim të plotë në Të, të mbetemi në Të, duke jetuar siç jetoi Ai e duke
mësuar prej tij dashurinë e vërtetë: “Çdo ditë, edhe kur nuk mungojnë vështirësitë
e mundimet, kapitjet e rrëzimet, edhe kur tundohemi ta braktisim rrugën pas Krishtit
e të mbyllemi në vetvete, në egoizimin tonë, pa menduar fare sa nevojë kemi për t’ia
hapur zemrën dashurisë së Zotit në Krishtin, për të jetuar logjikën e tij të dretjësisë
e të dashurisë”. Falë dashurisë së Krishtit – reflektoi Papa – nuk mund të
hyjmë në një drejtësi më të madhe, se ajo e dashurisë. Më pas Benedikti XVI u
ndal tek formula e cila, gjatë përhimjes, na kujton se jemi pluhur e në pluhur do
të kthehemi. Këtu – ripohoi Ati i Shenjtë – Fjala e Zotit na kujton brishtësinë tonë
njerëzore, madje vetë vdekjen tonë, që është forma e fundme e kësaj jete, tejet
të shkurtë e të përkohshme: “Përballë frikës së vdekjes, lindur bashkë me ne,
e aq më shumë në rrethanat e një kulture, e cila përdor të gjitha mjetet, që njeriu
ta harrojë se do të vdesë një ditë, liturgjia krezhmore, nga njëra anë na e kujton
vdekjen, duke na ftuar të jemi realistë e të urtë; por nga ana tjetër, na nxit sidomos
ta kuptojmë e ta jetojmë të renë e papritur, që feja e krishterë e nxjerr nga realiteti
i vetë vdekjes”. Njeriu është pluhur – kujtoi Papa – e në pluhur do të kthehet,
por nuk duhet harruar se nuk është pluhur dosido: është tejet i çmuar përpara syve
të Zotit, sepse Zoti e krijoi njeriun, duke i dhuruar fatin e pavdekësisë, të amshimit.
Edhe Jezusi – vërejti Ati i Shenjtë – e zgjodhi lirisht rrugën e mundimeve, sepse
deshi ta provonte brishtësinë njerëzore, posaçërisht përmes vdekjes në Kryq: “Por
pikërisht kjo vdekje, plot me dashurinë për Atin qiellor e për njerëzimin, ishte rruga
e lavdishme, që të çonte në ringjallje, përmes së cilës Krishti u bë burim i hirit.
E ky hir u dhurohet të gjithë atyre, që besojnë në Të e bëhen pjesëtar të vetë jetës
së tij hyjnore”. Kështu, pra, gjesti i vogël i përhimjes, na zbulon pasurinë
e jashtëzakonshme të kuptimit të tij: “Është ftesë për ta kaluar Kohën e Krezhmëve
si kredhje më të vetëdijshme e më të thellë në misterin e Pashkëve të Krishtit, në
vdekjen e në ngjalljen e tij, përmes pjesëmarrjes në Eukaristi e në jetën e dashurisë
së krishterë, që lind nga Eukaristia e në të gjen realizimin e vet të plotë”. Me
përhimjen – theksoi Papa – ne përsërisim premtimin tonë për ta ndjekur hap pas hapi
Jezusin, për t’u shndëruar nga misteri i Pashkëve të Tij, për të ngallënjyer mbi të
keqen e për të bërë të mirën, për të ecur në një rrugë, në të cilën njeriu ynë i
vjetër, i lidhur me mëkatin vdes e nis të jetojë njeriu i ri, i shndërruar nga hiri
i Hyjit. Në çastin e përshëndetjeve, Papa i ftoi të sëmurët t’i ofrojnë vuajtjet
e tyre, së bashku me Krishtin, për pendimin e kthesën e madhe të të gjithë atyre,
që janë ende larg nga Zoti. Më pas uroi që bashkëshortët e rinj ta ndërtojnë me guxim
e bujari familjen e tyre mbi shkëmbin e fortë të dashurisë hyjnore.