Papa ipeshkvijve irlandezë: abuzimi me të vegjlit është krim i urryer dhe mëkat kundër
Zotit. Të rifitohet besueshmëria morale e Kishës
(16.2.2010 RV)Të përballohet me guxim e ndershmëri gjendja e dhimbshme
e krijuar nga abuzimet me të vegjlit, nga ana e disa rregulltarëve dhe meshtarëve:
kjo është këshilla që u dha Benedikti XVI ipeshkvijve irlandezë, të mbledhur dje e
sot në Vatikan. Në përfundim të mbledhjes, Salla e Shtypit e Selisë së Shenjtë bëri
të njohur një komunikatë, në të cilën përsëritet gatishmëria e prelatëve për të bashkëpunuar
me institucionet përkatëse. Gjithashtu, paralajmërohet se gjatë Krezhmëve do të publikohet
një Letër baritore e Papës për katolikët irlandezë. Benedikti XVI u nënvizoi ipeshkvijve
se abuzimet seksuale me të vegjlit nuk janë vetëm “krim i tmerrshëm”, por edhe “mëkat
i rëndë, që fyen Zotin dhe plagos dinjitetin e njeriut, të krijuar sipas shembëlltyrës
së Tij”. Duke pranuar se gjendja e dhimbshme aktuale nuk do të zgjidhet në kohë të
shkurtra, Papa i këshilloi ipeshkvijtë t’i shohin problemet e së kaluarës me vendosmëri,
të flasin me një zë të vetëm për të përcaktuar hapat konkrete, që mund t’u sjellin
ngushëllim personave të abuzuar, të inkurajojnë përtëritjen e fesë në Krishtin e të
punojnë për rifitimin e besueshmërisë morale e shpirtërore të Kishës. Ati i Shenjtë,
thuhet në komunikatën për shtyp, përmendi në përgjithësi krizën e fesë që ka përfshirë
Kishën në Irlandë dhe e lidhi me mungesën e respektit për njeriun. Nga ana tjetër,
ky fenomen është një nga faktorët që kontribuan në abuzimin seksual me të vegjlit.
Prandaj, nënvizoi nevojën e reflektimit të thellë teologjik mbi krejt ngjarjen dhe
uroi që t’i kushtohet shumë më tepër vëmendje përgatitjes baritore, shpirtërore dhe
njerëzore të kandidatëve për meshtari e për jetën rregulltare. Nga ana e tyre,
ipeshkvijtë irlandezë pranuan se kjo situatë e dhimbshme ka sjellë një krizë besimi
në krerët e Kishës së vendit dhe ka dëmtuar dëshminë ungjillore e mësimin e saj moral.
Ata folën qartë për dhimbjen, urrejtjen, turpin e shkandullin e provuar nga viktimat
e abuzimeve. Ipeshkvijtë përmendën masat e marra për sigurimin e fëmijëve dhe të rinjve
dhe përsëritën se janë të gatshëm të bashkëpunojnë me autoritetet civile irlandeze
për dënimin e fajtorëve.