Vizitat ‘ad Limina Apostolorum’ të ipeshkvijve të vendeve të ndryshme në Vatikan
(14.02.2010 RV)Fillon nesër takimi i Papës me ipeshkvijtë e Konferencës ipeshkvnore
irlandeze, në Romë për vizitën e tyre ‘ad Limina’. Takimi i ipeshkvijve irlandezë
me Benediktin XVI, pason atë me ipeshkvijtë rumunë, që përfundoi të premten e kaluar.
Në takimin e përfundmitar me prelatët e Rumanisë, Ati i Shenjtë theksoi kryesisht
nevojën e vlerësimit të rrënjëve të krishtera të Evropës dhe të dialogut ndërmjet
katolikëve e ortodoksëve të Rumanisë. Duke u kthyer në të kaluarën, kujtoi me nderim
të thellë qëndrimin heroik të bashkësisë së krishterë të Rumanisë e të Republikës
së Moldovës, që në kohën e persekutimit mbetën të lidhura ngushtë me Krishtin e me
Kishën dhe e ruajtën të paprekur fenë. Gjithsesi – vërejti Ati i Shenjtë - edhe në
Rumani nuk mungojnë kurthet e pusitë e shoqërisë së shekullarizuar e të çorientuar,
që rrezikojnë sidomos familjen. Porosia e fundit, tejet e rëndësishme, e Papës,
me vlerë aktuale për të gjitha Kishat vendase: të ruhet trashëgimia e fesë, duke e
parë si një nga detyrat më të rëndësishme të Kishës e, sidomos, të ipeshkvijve.