U mbyll në Romë simpoziumi mbi ekumenizmin. Intervistë me ipeshkvin anglikan Tom Rajt.
(11.02.2010 RV)U mbyll dje në Romë Simpoziumi mbi ekumenizmin promovuar nga
Këshilli Papnor për Promovimin e Bashkimit të Krishterëve. Ishin të pranishëm përfaqësuesit
katolikë, luteranë, anglikanë, të reformuar dhe metodistë. Gjatë simpoziumit që bëri
bilancin e 40 vjetëve punë të dialogut ekumenik u pa nevoja e një dëshmie të përbashkët
të të krishterëve në një botë përherë e më të shekullarizuar. Në mikrofonin e Radio
Vatikanit flet ipeshkvi anglikan Tom Rajt:
Përgjigje: Mendoj
se sot ka vështirësi në jetën e të gjitha Kishave, sepse, ka një lloj fragmentarizimi
që disa persona e quajnë “postmodernizëm”. Prandaj secili thotë çfarë i do qejfi e
kundër çdo gjëje. Pyetja është kjo: “Kush flet me autoritet dhe në emër të Kishës?”
Dhe kjo ndodh jo vetëm brenda anglikanizmit. Ka zëra të ndryshme dhe ne duhet të përpiqemi
të kuptojmë nëse këto zëra përputhen me njëri-tjetrin. Në një farë mënyre Kisha
sot është një lloj lëvizjeje ekumenike në miniaturë: ka krahun e djathtë të vet, ka
krahun e majtë, ka tradicionalistët, radikalët apo quaji si të duash. Sigurisht,
Bashkimi Anglikan, vitet e fundit, fatkeqësisht, i ka nxjerrë hesapet e shtëpisë në
pazar, për arsye të ndryshme. Kjo do të thotë se Kishat e tjera, kur bie fjala për
ne thonë: “Kur flasim me anglikanët, nuk e dimë se me kë flasim!” Gjithçka që
mund të them si anglikan, hëpërhë, është se ne kemi “instrumentet” e bashkimit siç
janë: Kryeipeshkvi i Kanterbërit, Konferenca e Lambethit, takimi i Primatëve, Anglikan
Konsultativ Kaunsil, të cilët i janë përmbajtur një linje konstante përsa i përket
çështjeve kryesore. Pra, po qe se flasim brenda këtij konsensusi të gjerë atëherë
mund të thuash se flet në emër të Bashkimit Anglikan, ndonëse dikush edhe mund të
ngrihet e të thotë: “Unë nuk mendoj kështu”.