Iran: Revolucionit islamik përkujtohet me gjak dhe arrestime.
(11.02.2010 RV)Sipas lajmeve të përhapura në twitter, por jo të verifikuara,
sot, në ditën kur Irani feston përvjetorin e revolucionit islamik të 1979, pati tre
të vrarë dhe 120 të arrestuar. Siç pritej protestat kundër regjimit të Ahmadinexhadit
dhe të Ali Khameneit shpërthyen në mbarë vendin. Tre manifestues u vranë. Viktima
e parë, është një vajzë, Lejla Zarei, 27 vjeçe, vrarë me armë zjarri në sheshin Vali
Asër në Teheran. Sipas protestuesve, vrasësi quhet Rahim Razai, njofton siti internet
“persian2english”. Viktima e dytë është një person i paidentifikuar në lagjen Shararak
–e Garb, gjithnjë në kryeqytet, dhe viktima e tretë në Shiraz, në jug të Iranit. Gjithashtu
pati 100 të arrestuar në Mashad, në Iranin veriperëndimor dhe 20 në Shiraz, në Iranin
qendroro-jugor. Lajmi u dha nga siti internet i opozitës “Peykeiran”. Sipas sitit
tjetër internet “persian2english” një numër i papërcaktuar protestuesish u arrestua
edhe në Isfahan, në Iranin qendror, ku dëshmitarët thonë se forcat e sigurisë janë
treguar tepër të dhunshme kundër protestuesve. Gjatë manifestimeve protestuesit
grisën posterat e Ali Khameneit dhe hodhën parrullat : “Vdekje diktatorit” “Vdekje
Khameneit”. Po ashtu ata sulmuan e dogjën edhe motoçikletat e disa policëve basixhi
e thyen edhe xhamat e një makine që bënte tifozllëk për Ahmadinexhadin. Gjendja mbetet
ende tepër e tensionuar. Në planin politik, gjithshtu, situata mbetet e turbullt.
Bashkimi Evropian edhe kësaj here u tregua i përçarë në lidhje me situatën në Iran.
Disa vende si Franca, Mbretëria e Bashkuar, Danimarka, Hollanda, Gjermania, Austria
dhe Italia i bojkotuan fare festimet e revolucionit, ndërsa vende të tjera si Republika
Çeke, Qiproja, Irlanda dhe Spanja u përfaqësuan me një të ngarkuar me punë. Ndërsa
Bulgaria, Rumania, Polonia, Sllovenia, Hungaria, Sllovakia, Finlanda, Suedia, Belgjika,
Portugalia dhe Greqia u përfaqësuan në nivel ambasadorësh.