Enciklika “Caritas in Veritate” mbi globalizimin. Flet prof. Etore Goti Tedeski, presidenti
i IOR-it.
(11.02.2010 RV)Të dashur dëgjues,
këto ditë po transmetojmë një intervistë të gjatë me presidentin e Bankës së Vatikanit
IOR(Instituti i Veprave Fetare), prof. Etore Goti Tedeski mbi enciklikën e fundit
të Papës Benedikti XVI “Caritas in Veritate” e mbi propozimet e Atit të Shenjtë për
të dalë nga kriza ekonomike aktuale. Në Enciklikë, Benedikti XVI ngul këmbë mbi nevojën
e udhëheqjes së globalizimit, me një orientim “kulturor personalist dhe komunitar”,
thotë Papa, i cili kërkon një rend të ri ndërkombëtar. A janë objektiva që mund të
hyjnë shpejt në rendin e ditës së politikës botërore? Të dëgjojmë pjesën e tretë
të intervistës me presidentin e Bankës së Vatikanit:........ Përgjigjia
është po. Për Atin e Shenjtë e ardhmja është e lidhur gjithnjë me diçka
që neve na shpëton e që është hiri hyjnor, i cili e bën njeriun të bëjë mrekulli,
nëse mund të shprehemi kështu. Por, të shohim se ku është problemi. Ne nuk duhet ta
konsiderojmë globalizimin qëllim në vetvete. Globalizimi është mjet e një mjet i përshtatshëm
për të globalizuar të mirën, për të globalizuar vlerat, që i lejojnë njeriut të ketë
zhvillim të plotë. Pra, para së gjithash, globalizimi është mjet. Që të jetë i frytshëm
duhet të ketë një qëllim, si çdo mjet tjetër. Nuk ekziston ndonjë mjet që të jetë
i mirë në vetvete. As spitali, apo klinika nuk janë të mira në vetvete: është detyrë
e administratorëve të vendosin se ç’të bëjnë me to. Pra, mjeti nuk është i mirë, apo
i keq. Mjeti është neutral për natyrën e vet. Por për t’i dhënë kuptim përdorimit
të një mjeti, njeriu duhet të ketë ide të qarta, përndryshe mjeti – në rastin tonë
globalizimi – do të përvetësojë edhe idenë, mendimin. Nëse mendimi nuk përcakton mënyrën
e sjelljes, atëherë sjellja do të ndikojë mbi mendimin. Pse nuk
është e lehtë? Sepse ne po globalizojmë kultura të ndryshme, shumë të ndryshme
ndërmjet tyre. Të marrim tri zona të mëdha. Zona amerikanoveriore, nga pikpamja kulturore,
është protestante amerikane, shumë liberale, shumë e hapur, shumë liberiste, shumë
e vendosur, por me sjellje që nganjëherë na çudisin ne evropianëve, që jemi mësuar
ta pyesim gjithnjë veten nëse bëjmë mirë apo keq, madje duke humbur kohë. Ndërsa ata
ekzagjerojnë disi në aktivizmin e tyre, në vendimarrje, për t’u penduar më vonë. Pra,
modeli amerikan ka një këndvështrim kulturor mbi mënyrën si bëhen gjërat, që nuk është
si ai evropian. Ai evropian mbështetet tepër pak nga vetë ne, që ia ulim rëndësinë,
duke harruar rrënjët tona e gjërat në të cilat besojmë. Në këtë çast, Evropa është
në një situatë krejt tjetër, edhe përsa i përket krizës ekonomike. Para së gjithash,
është e ndarë e ka këndvështrime të ndryshme mbi mënyrën si bëhen gjërat. Lexoja në
gazetë kryeministrin francez Sarkozi, që thoshte: “Për emigracionin nuk do të bëjmë
të njëjtat gabime që ka bërë Italia”. Kjo të bën të mendosh se nuk do të jetë e lehtë
të biem dakord mbi një politikë të përbashkët evropiane mbi emigracionin. Të
shkojmë në Azi: të mendojmë se atje kemi Kinën dhe Indinë që mbizotërojnë. Çfarë kulture
fetare ka Kina? Kam një djalë që ndodhet në Kinë që prej tri vjetësh, është
ekonomist, e nganjëherë më flet e më lejon të kuptoj ndonjë gjë më shumë. Sjellja
ekonomike e një njeriu, qoftë ky bankier, industrialist, politikan apo ekonomist nuk
varet vetëm nga studimet që ka bërë, por edhe nga edukata që ka marrë. Cila është
edukata kineze? Ka pak nga konfucianizmi, pak nga budizmi e pak nga maoizmi, përzier
bashkë. Atëherë, ç’kuptim ka për ta të thonë të vërtetën, të mbajnë fjalën, të kenë
sensin e detyrës, të bindjes? A është i njëjtë me tonin? Nuk e di. Pastaj
kemi Afrikën, që na shqetëson më shumë në skenarin ndërkombëtar, që është krijuar.
Afrika, që ne ish-kolonialistët evropianë e kemi përbuzur gjithnjë, e kemi konsideruar
si diçka për t’u përdorur sipas nevojave, për ta ndihmuar më vonë edhe të zhvillohet,
pasi rritja e intelektualëve në Afrikë varet edhe nga fakti se kolonializmi i mirë
evropian ka përçuar vlera të shumta: vendet e kolonizuara janë zhvilluar më parë,
s’ka dyshim për këtë. Por sot, Afrika varet nga kinezët, të cilët po shfrytëzojnë
si burimet e lëndët e para, ashtu edhe krahun e punës. Afrikani po bëhet krahu i lirë
i punës i kinezëve. Por a ka kinezi të njëjtin këndvështrim mbi njeriun si ne? Këto
janë, sipas meje, pyetjet e mëdha që shtron Papa. Ja përse është i shqetësuar se cilat
janë vlerat e njeriut në procesin e globalizimit. Sot, ekziston vetëm një autoritet
i madh moral, që përmend pa pushim vlerën e njeriut: Papa dhe Kisha e Shenjtë Katolike
Apostolike romake. Unë nuk di tjetër.