Papa për Ditën e 18-të Botërore të Sëmurit: vuajtja njerëzore ka kuptim në planin
e dashurisë së Zotit
(09.2.2010 RV)Papa Benedikti XVI do
të kremtojë të enjten e ardhshme, më 11 shkurt, në ora 11.00 në Bazilikën e Vatikanit,
Meshën e Shenjtë për të sëmurët, në festën liturgjike të së Lumes Virgjër Mari të
Lurdë e në Ditën e 18-të Botërore të të Sëmurit, që sivjet përqendrohet mbi temën
“Kisha në shërbimin e dashurisë për ata që vuajnë”. Vlerës së dinjitetit njerëzor
në sëmundje e në vuajtje, Papa i ka kushtuar vëmendje të veçantë në shumë raste e
fjalime. T’i përshkojmë së bashku disa nga reflektimet e Benediktit XVI mbi këtë argument. “Pse
vuajmë? A mund të konsiderohet në mënyrë pozitive përvoja e dhembjes? Kush mund të
na lirojë nga vuajtja e nga vdekja?”: këto janë, pranon Benedikti XVI, pikëpyetjet
thelbësore. Pyetje, pohon Papa, që “nga pikëpamja njerëzore, në të shumtën e rasteve,
mbetën pa përgjigje”, pasi që vuajtja “përbënë një enigmë të pashqyrtueshme për arsyen”.
E megjithëkëtë, vuajtja nuk është e pa kuptimtë: “Në sprovë e në sëmundje Zoti
na viziton në mënyrë të mistershme e, nëse e lëshojmëveten në
vullnetin e tij, mund të përjetojmë e shijojmë fuqinë e dashurisë së tij” ( Fjalimi
në Spitalin “Shën Gjon Pagëzuesi” në Romë, 2 dhjetor 2007). Sëmundja, nënvizon
Papa, “është sprovë e dhimbshme dhe e veçantë, mirëpo para misterit të Hyjit, që ka
marrë trupin tonë të vdekshëm, ajo merr kuptimin e vet dhe bëhet dhuratë e rast i
shenjtërimit”. Vuajtja, në misterin e Zotit, bëhet dashuri për të tjerët: “Atëherë
kur vuajtja e dëshpërimi bëhen më të forta, mendoni që Krishti është duke ju bashkuar
me kryqin e tij sepse përmes jush don t’u thotë një fjalë dashurie atyre që e kanë
humbur rrugën e jetës e, të mbyllur në zbrazëtinë e egoizmit, jetojnë në mëkat e larg
nga Zoti. Në të vërtetë, gjendja e juaj shëndetësore dëshmon se jeta e vërtetë nuk
është këtu, por pranë Hyjit, ku secili prej nesh do të gjejë gëzimin e vet nëse me
përvujtëri do të ecën gjurmëve të tij, pas njeriut më të vërtetë: Jezusit të Nazaretit,
Mësuesit e Zotërisë”. (Fjalimi në Hospice Sacro Cuore në Romë, 10 dhjetor 2009). Ja
se pse, na tërheq vëmendjen Papa, duhet ta kundërshtojmë mendësinë e efektshmërisë
që anon t’i mënjanojë personat e sëmurë, duke i konsideruar ata si “peshë dhe problem
për shoqërinë”: “Kush e njeh kuptimin e dinjitetit njerëzor e di se duhet të
respektohen e mbështetën vështirësitë dhe vuajtjet që lidhen me kushtet shëndetësore
të njerëzve”. (Fjalimi në Hospice Sacro Cuore në Romë, 10 dhjetor 2009). Spitalet
dhe shtëpitë e kurimeve, është reflektimi i Papës, mund të bëhen “vende të privilegjuara
për të dëshmuar dashurinë e krishterë që e ushqen shpresën”. Kjo shpresë e madhe,
nënvizoi më tutje Ati i Shenjtë, “mund të jetë vetëm Zoti, që e përqafon gjithësinë
e mund të na propozon e dhuron atë që, vetvetiu, nuk mund ta arrijmë”: “Ai që
mund ta zhduk fuqinë e së keqes është vetëm Zoti. E pikërisht për faktin që Jezu Krishti
ka ardhur në botë, për të na zbuluar planin hyjnor të shpëtimit tonë, feja na ndihmon
të depërtojmë e të gjejmë kuptimin e gjithë asaj që është njerëzore e këndej edhe
të vuajtjes”. (fjalimi në Casa Sollievo della Sofferenza, San Giovanni Rotondo,
21 qershor 2009). Një thirrje të veçantë Papa i drejton personelit shëndetësor,
që është i thirrur, çdo ditë ta dëshmojë dashurinë e Zotit ndaj personit që vuan.
Dashuria e përzemërsia, nënvizon Ati i Shenjtë, “shprehin një vëmendje posaçërisht
domethënëse pikërisht në përkujdesjen e të sëmurëve”. E në Eukaristinë, Papa e tregon
themelin e veprimtarisë baritore në fushën e shëndetësisë: “Pikërisht në Eukaristi
veprimtaria baritore e shëndetësisë mund të nxjerr vazhdimisht forcë për të ndihmuar
me sukses njeriun e për ta respektuar atë në dinjitetin e tij”.(Fjalimi drejtuar
Këshillit Papnor për Baritorinë e Shëndetit, 22 mars 2007).