У суботу, 30 студзеня, у Лондане адбыўся штогадовы з'езд англа-беларускага таварыства.
Была абраная рада арганізацыі. Склад рады застаўся амаль такі ж, як і год таму. Таксама
былі абмеркаваныя мерапрыемствы, якія плануецца правесці ў гэтым годзе, сярод іх: Дзень
матчынай мовы (27 лютага); канцэрт Браэна Бэнэта, былога брытанскага амбасадара
ў Беларусі (24 красавіка); святкаванне 600-х угодкаў Грунвальдскай бітвы; лекцыя
пра блогінг у Беларусі. Прадметам гарачай дыскусіі стала прапанова прызначэння
прэзідэнта таварыства – ганаровай пасады, якую ў мінулым традыцыйна займалі добра
вядомыя і ўплывовыя асобы. Канчатковага рашэння не было прынята і пытанне было вернута
радзе для далейшага абмеркавання. Таксама была агучана прапанова змяніць назву арганізацыі
для таго, каб яна адлюстроўвала свой дэ-факта брытанскі, а не толькі англійскі характар.