Papa ipeshkvijve skocezë: mbrojeni Ungjillin nga ata që duan t’ia zvogëlojnë forcën
(04.02.2010 RV)Sot paradite, Papa Benedikti XVI priti në audiencë ipeshkvijtë
skocezë, të cilët kanë ardhur për vizitë ad Limina në Vatikan. Ati i Shenjtë u foli
për mbrojtjen e jetës, për formimin e brezave të rinj të meshtarëve e të laikëve,
që të dinë të dëshmojnë të vërtetën e krishterë në çdo fushë e në çdo vend. Duhen,
tha qartë Papa, meshtarë që impenjohen seriozisht në lutje e që e jetojnë me gëzim
shërbimin e tyre, pasi kjo sjell fryte jo vetëm për jetën shpirtërore të besimtarëve,
por edhe për thirrjet e reja: “Emphasize the indispenable role of the priest… Të
nënvizohet roli i domosdoshëm i meshtarit në jetën e Kishës, sidomos në kujdesin për
Eukaristinë, nga e cila gjallërohet vetë Kisha. E inkurajojini personat që kanë për
detyrë formimin e seminaristëve, të bëjnë ç’është e mundur për të përgatitur një brez
të ri meshtarësh të impenjuar e të zellshëm, të formuar mirë nga pikpamja njerëzore,
nga ajo akademike e shpirtërore për të shërbyer në shekullin XXI”. Po kjo gjë
duhet bërë edhe me laikët, theksoi Papa Racinger, pavarësisht se pa u përzier me detyrat
që mund t’i kryejë vetëm meshtari. Formimi i laikëve fillon nga shkollat e nga ato
katolike, në veçanti: “As you encourage Catholic teachers… Duke
i nxitur mësuesit në punën e tyre, vini theksin veçanërisht në cilësinë dhe thellësinë
e edukimit fetar, në mënyrë që të përgatiten laikë katolikë të mirëinformuar, në gjendje
dhe të gatshëm të kryejnë misionin e tyre. Prania më e madhe katolike në media, në
politikën lokale e kombëtare, në gjykatë, në profesione të ndryshme e në universitete
s’bën tjetër, veçse i shërben pasurimit të jetës kombëtare të Skocisë, me persona
fetarë, që dëshmojnë të vërtetën, sidomos kur ajo vihet në diskutim”. Në fjalimin
e Atit të Shenjtë nuk mungoi edhe trajtimi i sfidave të shekullarizimit në rritje
në Skoci. Përkrahja e eutanazisë, u tha Papa ipeshkvijve, e godet në zemër konceptin
e krishterë mbi dinjitetin e jetës njerëzore: “Recent developments
in medical ethics… Zhvillimet e fundit në fushën e etikës mjekësore
dhe disa praktika në fushën e embrionologjisë krijojnë shqetësime të mëdha. Nëse mësimi
i Kishës kompromentohet, qoftë edhe pak, në njërin prej këtyre sektorëve, bëhet e
vështirë mbrotja e doktrinës katolike në tërësinë e saj”. Barinjtë e Kishës,
vazhdoi Benedikti XVI, duhet t’i këshillojnë gjithnjë besimtarët të respektojnë e
të ndjekin mësimet e Magjisterit, duke mbështetur njëkohësisht, të drejtën e Kishës
për të jetuar lirisht në shoqëri, sipas bindjeve të veta. Më pas, shtoi:
“All too often the Church’s doctrine… Tepër shpesh, doktrina e Kishës
kuptohet si një sërë ndalimesh e qëndrimesh të vjetra, ndërkohë që realiteti, siç
e dimë, na tregon se ajo është krijuese e jetësore dhe ka për qëllim realizimin më
të plotë të mundësive të mëdha të së mirës e të lumturisë, që Zoti ka dikuar në secilin
prej nesh”. Ati i Shenjtë i përgëzoi ipeshkvijtë për hapat e bëra në fushën
e ekumenizmit. 450 vjet pas asaj, që Papa e quajti “ndarje të dhimbshme” të Kishës
katolike në Skoci, Benedikti XVI vuri në dukje përparimet e bëra për të shëruar plagët
e asaj kohe, të cilat duken edhe sot me sektarizmin, që vazhdon të ngrejë krye. Duke
i rezistuar presioneve që kanë për qëllim ta zvogëlojnë rëndësinë e mesazhit të krishterë,
përfundoi Papa, orientohuni drejt bashkimit të plotë e të dukshëm, për t’iu përgjigjur
tërësisht vullnetit të Krishtit.