Obama përballë amerikanëve pranon gabimet, por nuk tërhiqet nga reformat.
(28.01.2010 RV)Presidenti Barak Obama mbajti dje në Kapitol Hill fjalimin e
shumëpritur mbi gjendjen e përgjithshme në SHBA, duke u përqëndruar tek viti i fundit. Mes
tjerash presidenti deklaroi një sërë masash për të stimuluar shtresën e mesme si investime
për të rinjtë, miliarda dollarë investime për trena të shpejtësisë së lartë, ndihma
për familjet që mbajnë fëmijët por edhe gjyshërit, e në fund pezullimin e rrogave
të majme të supermenaxherëve të administratës. Gjithashtu presidenti Obama pranoi
disa gabime gjatë vitit të parë të presidencës së tij. “Kur ishte puna e krizës i
jemi kushtuar më shumë Uoll Stritit sesa problemeve të njerëzve të thjeshtë.” tha
Obama. Por presidenti theksoi se pavarësisht vështirësive, as që i shkon nëpërmend
të heqë dorë nga reformat në shëndetësi. Kështu pas një viti qeverisjeje presidenti
Obama i kërkon përsëri amerikanëve pëlqimin e tyre. Në mikrofonin tonë flet Paolo
Mastrolilo, specialist i politikës amerikane i gazetës “La Stampa”:
Përgjigje:
Presidenti kishte nevojë, që t’ua bënte të ditur amerikanëve se i ka kuptuar vështirësitë
e tyre, problemet, cilat janë pakënaqësitë për vitin e parë të presidencës së tij,
gjë që amerikanët e shprehën qartë në votimet e fundit në Masaçusets, ku demokratët
humbën një vend në senat. Por në të njëjtën kohë, sikur të kishte ndryshuar krejtësisht
kurs në krahasim me një vit më parë, do të kishte krijuar përshtypjen se as ai vetë
nuk beson tek programet e paraqitura gjatë zgjedhjeve presidenciale. Pra, te ky fjalim
është përpjekur që të rivendosë ekulibrin. Me fjalë të tjera, nga njëra anë të pranojë
gabimet e veta, kufizimet e presidencës së tij, por dhe ana tjetër të ripohojë të
mirën e programeve të parashtruara dhe nevojën nga ana e politikanëve të Uashingtonit,
- demokratë dhe republikanë - për të bashkëpunuar për realizimin e reformave. Këto
sipas tij janë të nevojshme që mekanizmi i ekonomisë amerikane të rivihet në punë.