Zgjedhje presidenciale në Sri Lanka: shpresa e Kishës
(25.01.2010 RV)Prag zgjedhjesh në Sri Lankë, ku nesër do të votohet për presidentin,
për herë të parë pas konfliktit të përgjakshëm ndërmjet ushtrisë qeveritare dhe Tigrave
Tamil, i cili zgjati gati 30 vjet. Kandidatët për president janë aktuali, Mahinda
Rajapaksa dhe ish-komandati i ushtrisë, Sarath Fonseka. Ndryshimi më i madh ndërmjet
tyre është qëndrimi ndaj Republikës Srilankeze, të cilën kreu aktual i shtetit dëshiron
ta mbajë presidenciale, ndërsa lideri i opozitës premton ta kthejë në parlamentare.
Me rastin e votimit, kryeipeshkvi i kryeqytetit Kolombo, imzot Malcom Ranjith uroi
që vendi të hyjë në një periudhë “paqeje dhe zhvillimi të vërtetë”.