Sot e diele 24 janar, kalendari liturgjik i Kishës kremton të dielën e
3-të gjatë Vitit Kishtar e po sot me 24 janar kalendari Kishtar përkujton
Shën Françesku i Sales, ipeshkëv i Gjenevës e doktor i Kishës, themelues i Urdhrit
të Vizitacionit dhe pajtor i shtypit katolik. Nesër e hënë 225 janar, është
dita e tetë dhe e fundit e Javës së Lutjes për bashkimin e të krishterëve dhe festa
e të Kthimit të Shën Palit Apostull . Festa e tij na kujton se Krishti u ngjall,
duke e shndërruar vdekjen në jetë. Të martën e ardhshme me 26 janar, sipas
kalendarit Kishtar do të kremtohen Shën Timoteu e Shën Titi, ipeshkvij, nxënës
të Shën Palit si dhe Shën Paola, matronë romake. Liturgjia e festës së tyre na
kujton se Apostujve, të cilët duan të dalin mbi të tjerët, Jezusi u paraqet vetveten
si model shërbimi. Shën Angela Meriçi, virgjër, themeluese e Orsolineve si dhe Shën
Vitaliani papë, që do të kremtohen të mërkurën që vjen me 27 janar, na
kujtojnë se në sa kthehen nga misioni, apostujt rrezikohen të bien në triumfalizëm,
por Jezusi u kujton se duhet të jenë gjithnjë shërbëtorë të njerëzve. Të enjten
e ardhshme me 28 janar, kalendari Kishtar përkujton festën e Shën Tomës së
Akuinit, meshtar dominikan, doktor i Kishës, pajtor i shkollave katolike. Të
premten që vjen me 29 janar, kalendari Kishtar do të kremtojë Shën Kostancin,
ipeshkëv i Perugjës dhe Shenjtorët Papia e Mauri, ushtarë martirë. Ata na kujtojnë
se Krishti kërkon edhe shëlbimin e paganëve e se ai ngadhënjen mbi vdekjen e mbi të
gjithë shpirtrat e ndyrë. Ngjallja e Jezusit hapi rrugën për t’ia predikuar Ungjillin
mbarë njerëzimit. Liturgjia e festës së Shën Martinës, martire,
që do të kremtohet të shtunën me 30 janar, na kujton se fuqia që del nga Jezusi
shëron e jep jetë. Kush është me të, kush e prek, kush e takon e e mikpret, fiton
nga Zoti jetën e pasosur. Të dielën e ardhshme me 31 janar, bie
e diela e 4-të gjatë vitit Kishtar e po këtë ditë, me 31 janar, kalendari liturgjik
përkujton Shën Gjon Boskon, meshtar e themelues i Salezianëve, atë e mësues i
të rinjve. Festa e Shën Gjon Boskut na kujton se edhe njerëzit e kohëve tona shkandullohen
e çuditen për Jezusin: e për ta pranuar, duhet parë me sytë e fesë e të dashurisë,
që na mësojnë se Krishti është Biri i Zotit e se prandaj vetëm kush beson në Të, e
percepton të renë që Ai e Fjala e Tij Ungjillore sjell ndërmjet njerëzve.