Papa në Sinangogën e Romës: kujtimi i së kaluarës dhe urdhërimet e Tënzot baza e dialogut
(17.01.2009 RV)Papa Benedikti XVI kremtoi sot paradite Lutjen e Engjëllit të
Tënzot, gjatë së cilës foli sërish për popullsinë e Haitit dhe për emigrantët e vegjël,
të cilëve u është kushtuar Dita e sotme e Emigrantit. Pasdite, Ati i Shenjtë shkoi
për vizitë në bashkësinë hebraike të Romës e në Tempullin e Madh, që ndodhet mjaft
afër Vatikanit. Bashkësia hebraike është shumë e vjetër në Romë. Që në vitet 70 pas
Krishtit ka dëshmi për praninë e hebrenjve në kryeqytetin e sotëm italian. Benedikti
XVI deshi kështu të ndjekë gjurmët e paraardhësit të tij, Gjon Palit II, i cili pati
vizituar Tempullin e Madh të Romës, më 13 prill 1986. Pikërisht sot ishte dita
e dialogut ndërmjet katolikëve dhe hebrenjve, që kremtohet çdo vit. Për bashkësinë
hebraike kjo ditë ka edhe një rëndësi të veçantë. Sot, më dy të shevatit, kremtohej
“Mo’ed i plumbtë”, në kujtim të një ngjarjeje të mrekullueshme. Ishte viti 1793 dhe
mbi Itali po frynte era e “lirisë dhe barazisë” së Francës republikane. Me bindjen
se në geton e hebrenjve në Romë fshiheshin një grup revolucionarësh francezë, disa
persona i vunë zjarrin portës, por zjarri u shua shpejt për shkak të shiut, që filloi
në atë çast. Për hebrenjtë, ishte dora e Zotit ajo që i ndihmoi në këtë ditë të vështirë
e edhe në tetë ditët e shtetrrethimit që pasuan. Festa quhet “e plumbtë”, për të kujtuar
qiellin gri, mbushur me re e me shi. I referohet gjithashtu edhe hapjes së qiellit
“të plumbtë” në librin e Zanafillës, pasi pushoi shiu dhe Arka e Noesë u ndal në malet
e Araratit. Sapo mbërriti në Portikun e Otavies, Papa u prit nga autoritetet e
bashkësive hebraike të Italisë e të Romës dhe vuri lule në lapidarin, që kujton ditën
tragjike të 16 tetorit 1943, kur SS-ët gjermanë dërguan në masë në kampet e përqëndrimit
hebrenjtë e Romës. Më pas, Benedikti XVI u ndal në pllakën përkujtimore, që kujton
atentatin e 9 tetorit 1982, në të cilin humbi jetën një fëmijë hebre dy vjeçar, Stefano
Také, dhe 37 persona të tjerë mbetën të plagosur ndërsa dilnin nga Tempulli. Pikërisht
në shkallët e Tempullit, Papa u prit nga Kryerabini Rikardo Di Senji. Pas një minuti
heshtjeje për viktimat e tërmetit në Haiti, kryetari i Bashkësisë hebraike të Romës,
Rikardo Paçifiçi, ai i Bashkësive hebraike italiane, Renxo Gatenja dhe vetë kryerabini
i drejtuan Atit të Shenjtë një përshëndetje, duke i uruar mirëseardhjen: --------fjalë
në hebraisht---- Në fjalimin që mbajti, Benedikti XVI vuri në dukje se dialogu
ndërmjet të krishterëve dhe hebrenjve ka marrë hov të ri që nga Koncili II i Vatikanit
dhe nuk mund të kthehet mbrapa. Duke kujtuar shfarosjen e hebrenjve nga nazistët,
Papa, pasi dëgjoi falenderimet e përfaqësuesve hebraikë për guximin e anëtarëve të
Kishës që fshehën judej, përmendi edhe se Gjon Pali II pati kërkuar falje për gjithçka
që mund të ketë ndikuar në ndonjë farë mënyre për të hapur plagët e antisemitizmit
dhe të antijudaizmit në botë. E në këtë vazhdë, Ati i Shenjtë kujtoi edhe deportimin
e hebrenjve të Romës në kampet e përqëndrimit, sidomos në Aushvic. Nuk është e mundur
të harrohen fytyrat, emrat, lotët, dëshpërimi i tyre, theksoi Papa: “Fatkeqësisht,
shumë mbetën indiferentë, por shumë, edhe ndër katolikët italianë, të mbështetur nga
feja e mësimi i krishterë, reaguan me guxim, duke hapur krahët për të ndihmuar hebrenjtë
e ndjekur, shpesh edhe me rrezik jete, duke merituar mirënjohjen e përhershme. Edhe
Selia Apostolike ndihmoi, shpesh fshehtas e pa u dukur. Kujtimi i këtyre ngjarjeve
duhet të na shtyjë të forcojmë lidhjet që na bashkojnë, që të rritet gjithnjë e më
shumë mirëkuptimi, respekti e mikpritja”. Më pas, Ati i Shenjtë nënvizoi trashëgiminë
e përbashkët të hebrenjve dhe katolikëve e vuri në dukje se në dhjetë Urdhërimet e
Tënzot, apo në “Dhjetë fjalët”, siç i quajnë hebrenjtë, mund të gjenden fushat e bashkëpunimit
e të dëshmisë së përbashkët. E Papa përmendi tre prej tyre: “Dhjetë fjalët”
kërkojnë të njohim një Zot të vetëm, kundër tundimit për të ndërtuar idhuj të tjerë,
apo viça të artë… “Dhjetë fjalët” kërkojnë respektin e mbrojtjen e jetës, kundër çdo
padrejtësie e abuzimi, duke njohur vlerën e çdo njeriu, krijuar në shembëlltyrë e
në ngjashmëri me Zotin… “Dhjetë fjalët” kërkojnë të ruhet e të nxitet shenjtëria e
familjes, në të cilën “po”-ja personale e reciproke, besnike dhe përfundimtare e burrit
dhe e gruas, krijon hapësirë për të ardhmen, për humanitetin e vërtetë të secilit
dhe njëkohësisht, hapet para dhuratës së jetës së re”. Papa përmendi, ashtu
siç bëri më parë kryerabini Di Senji, dialogun ndërmjet katolikëve dhe hebrenjve dhe
mbledhjen e Komisionit të përzier që pikërisht nesër do të diskutojë në Romë mbi temën
“Mësimi katolik dhe ai hebraik mbi gjithësinë dhe ambientin”. Benedikti XVI përfundoi
duke iu lutur Zotit për dhuratën e paqes në Tokën Shenjte. Pas lutjes tradicionale
hebraike “Anì Maamin”, Ati i Shenjtë zhvilloi një takim privat me rabinin Rikardo
Di Senji, për të dalë pastaj në oborrin e Tempullit, ku është mbjellë ulliri që kujton
këtë vizitë e për të shkuar në Muzeun hebraik të Romës, ku u përurua ekspozita “Et
Ecce gaudium” me 14 vizatime të përgatitura në vitet ‘700 nga Bashkësia Hebraike për
kurorëzimin e Papëve. Në orën 18.00, Benedikti XVI u takua me disa përfaqësues të
bashkësisë hebraike në Sinagogën spanjolle për t’u kthyer më pas në Vatikan.