(11.01.2010 RV)Për Shën Ingjinin dihet me siguri vetëm se e drejtoi Kishën
universale nga viti 136 deri në vitin 140. Besohet se ishte me origjinë nga Athina.
Vdiq gjatë persekutimit të Antonit Pio. Aty nga fundi i shekullit të 11-të, Shën
Ireneu, duke u kthyer nga një udhëtim në Romë, hartoi listën e 12 ipeshkvijve, që
pasuan njëri-tetrin në Selinë romake, duke nisur nga Shën Pjetri deri në ditët e tij.
Igjini ishte i nënti në radhë, i vetmi që mbante këtë emër, pasardhës i Telesforit,
që dha një dëshmi të shkëlqyer, domethënë u martirizua nën perandorin Adrian. Libri
i Papëve si dhe Martiriologu Romak pohojnë se edhe vetë Igjini pësoi martirizimin
më 11 janar të vitit 140 (?), gjatë persekutimit të Antonit Pio dhe u varros pranë
trupit të të lumit Pjetër, në kodrën e Vatikanit. Megjithatë, mund të themi se nuk
ka prova të sigurta që Ingjini të ketë vdekur martir. Të tjera ishin meritat e Papës
athiniot. Gjatë papnisë së tij të shkurtër, u pakësuan sulmet e paganëve kundër racës
së re të “njerëzve pa atdhe”, siç quheshin të krishterët, ndërsa Kisha u kërcënua
nga përhapja e sekteve heretike, në vetë gjirin e saj. Kështu Igjinit iu desh t’i
bënte ballë për katër vjet me radhë, herezisë njostike të Valentinit e të Çedonit,
sipas të cilëve, besimtarëve të thjeshtë u mjaftonte feja, ndërsa shkenca, që mund
të shpjegojë nivelin filozofik të fesë, u përkiste dijetarëve. Igjini, që ishte vetë
filozof, i shkishëroi heretikët. Vërejmë se pikërisht atëherë kur Barka e Shën Pjetrit
kërcënohej nga dallgët e herezisë, me prirjen ta bënte Zbulesën hyjnore një filozofi
të thjeshtë fetare, në fronin e Princit të Apostujve u ul një filozof, që u përpoq
me të gjitha forcat për ruajtjen e tërësisë së mësimit të vërtetë ungjillor. Duke
ndjekur shembullin e Adrianit, që kishte krijuar një aparat efikas burokratik, i cili
siguronte mbarështimin e perandorisë së pakufishme romake, ndërhyu në strukturën hjerarkike,
duke themeluar Urdhërat e vegjël, sepse krijonin mundësinë për t’i shërbyer më mirë
Kishës e për t’i përgatitur kandidatët për meshtari, duke i afruar pak nga pak tek
Misteret e shenjta. Nga koha e tij arrin deri tek ne edhe prania e nunëve në Sakramentin
e Pagëzimit.