Kështjella e paqes dhe e gjithësisë mbrohet duke respektuar dinjitetin e njeriut:
komente mbi fjalimin e Papës para Trupit Diplomatik.
(12.01.2010 RV)Mbrojtja e jetës
është premisa për mbrojtjen e Gjithësisë dhe të paqes: ky është thelbi i mesazhit
të Papës, shprehur në fjalimin tradicional para Trupit Diplomatik të akredituar pranë
Selisë së Shenjtë, në fillimin e Vitit të Ri. Pikërisht mbi marrëdhëniet ndërmjet
ekologjisë njerëzore dhe mbrojtjes së mjedisit, argument i rrahur nga të gjitha anët
nga Benedikti XVI, flet në mikrofonin tonë themeluesi i shoqatës “Sermig – Arsenali
i paqes”, Ernesto Olivero: Ajri që fus në mushkëri është i mirë, më jep jetë,
por nëse ajrin e dhunoj, herët a vonë, diçka i ndodh edhe frymëmarrjes. Frymëmarrja
fillon nga pemët, fillon nga thithja e ajrit të gjelbërimit, fillon nga detyra për
të mos hedhur asgjë… Jemi pjesë e aventurës së Zotit, që na ka vendosur në fusha të
gjelbëruara, siç thotë Bibla, por ne, nganjëherë, fushën e gjelbëruar e mbushim me
çimento e me spekullime. Nëse ndokush merr më shumë nga sa i duhet, u heq diçka të
tjerëve. Me të vërtetë, në bazën e krizave ekonomike dhe të shfrytëzimit të
ambientit, siç tha Papa, qëndron egoizmi. Benedikti XVI bën thirrje për ta vënë dinjitetin
e njeriut në qendër të gjithçkaje… Natyrisht! Është lakmia që e ka verbëruar
njeriun. Por Papa na kujton se kjo krizë mund të jetë edhe mundësi për të ndryshuar
mënyrën e veprimit. Kisha pastaj, mund të bëhet mësuese e dëshmitare. Por kjo varet
edhe nga secili prej nesh, që e quan veten të krishterë; duhet të jetë me të vërtetë
i tillë, ta dëshmojë fenë me heshtje, me jetë me impenjimin aty ku punon e banon. Në
fjalimin para Trupit Diplomatik, Ati i Shenjtë kërkoi edhe respektimin e lirisë fetare.
Edhe sot vazhdojnë të vijnë lajme për sulme kundër të krishterëve në Malajzi, në Algjeri,
në Egjipt e në Irak… Shikoni se në Evropë kemi një mundësi të madhe – e nuk
po e shfrytëzojmë mirë – për t’i bërë të tjerët të kuptojnë se liria fetare duhet
të ekzistojë në çdo kënd të botës. Ne i biem botës kryq e tërthor dhe vërejmë se nuk
është kështu. Evropa mund të tregojë rrugën për këtë. Gjithnjë në fjalimin
para Trupit Diplomatik, Benedikti XVI i bëri thirrje bashkësisë ndërkombëtare të vendosë
dinjitetin e njeriut në bazën e marrëdhënieve ndërkombëtare. Thirrje mëse aktuale,
siç nënvizon pedagogu i Marrëdhënieve Ndërkombëtare në Universitetin e Padovës në
Itali, prof. Antonio Papiska. Ta dëgjojmë… Me Papën është edhe e drejta e re
ndërkombëtare, që i ka rrënjët në Kartën e OKB-së e në Deklaratën Universale të të
drejtave të njeriut. Këtu kemi një jurisprudencë të re, të cilën jemi të detyruar
ta respektojmë të gjithë. Kjo temë, e pra edhe vlera e dinjitetit të njeriut është
një parim, që bën pjesë në atë nivel të epërm të një rendi për të cilin flet Papa
në “Caritas in Veritate”. A është me të vërtetë universal horizonti i Selisë
së Shenjtë dhe i Papës? Për shembull, kohët e fundit, Vatikani ka lidhur marrëdhënie
edhe me Rusinë… Mund të flasim për marrëdhënie shumëpalëshe virtuoze dhe të
frytshme. Sipas meje duhet të ngulim këmbë mbi temën e familjes njerëzore, shumë të
dashur për Papën, të cilën ai e zhvillon – të themi – në “rrathë koncentrikë”. Niset
nga njeriu e marrëdhëniet e tij me të tjerët për të arritur më pas tek familja e tek
familja njerëzore. Duhet azhornuar edhe gjuha dhe kuptimi i disa shprehjeve si për
shembull “bashkësi ndërkombëtare”: ç’është kjo? Ndonjë klub shtetesh? Bashkësia ndërkombëtare
është bashkësia e njerëzve, anëtarë të së njëjtës familje njerëzore, të drejtat themelore
të të cilëve njihen nga ligjet ndërkombëtare në fuqi. Një temë shumë e dashur
për Atin e Shenjtë është ruajtja e mbrojtja e gjithësisë. Edhe përmes saj, Benedikti
XVI nënvizon sërish rëndësinë e vëllazërimit dhe të familjes njerëzore… Në
mesazhin për 1 janarin, Ditën Botërore të Paqes, trajtohen tema që i gjejmë në enciklikën
“Caritas in Veritate”. Janë tema që kanë të bëjnë me qeverisjen e një bote gjithnjë
e më të ndërlidhur, gjithnjë e më të globalizuar. Ambienti natyror i krijuar, i cili
është dhuratë, duhet administruar e qeverisur, por me cilat ligje? Edhe një herë kthehet
tema e të drejtave të njeriut. I kemi këto ligje e janë të mira e të drejta, mjafton
t’i zbatojmë.