Dhuna nuk është kurrë rruga për të zgjidhur vështirësitë: në Lutjen e Engjëllit të
Tënzot, thirrja e Benediktit XVI në mbrojtje të emigrantëve dhe të të krishterëve
të persekutuar. Papa pagëzon 14 fëmijë.
(11.01.2010 RV)Zemra e Papës është
pranë atyre që vuajnë, pranë emigrantëve dhe të krishterëve, viktima të persekutimit.
Në Lutjen e djeshme të Engjëllit të Tënzot, në festën e Pagëzimit të Zotit, Benedikti
XVI bëri një thirrje të fuqishme kundër dhunës, në mbrojtje të dinjitetit të njeriut,
pas ngjarjeve të këtyre ditëve në jug të Italisë e në Egjipt e Malajzi. Po dje, Ati
i Shenjtë kremtoi meshën në Kapelën Sikstine në Vatikan, ku pagëzoi 14 fëmijë e u
ndal në domethënien e këtij sakramenti.
Por të kthehemi tek Lutja e Engjëllit
të Tënzot. Papa kujtoi emigrantët e shfrytëzuar në jug të Italisë, që këto ditë protestuan
në Rozarno, duke shkaktuar edhe përgjigjen e dhunshme të popullsisë. Duke bërë thirrje
që të lihet mënjanë dhuna nga të dyja palët, Benedikti XVI theksoi: “Duhet
të nisemi nga thelbi i problemit! Duhet të nisemi nga njeriu! Emigranti është qënie
njerëzore, i ndryshëm për nga prejardhja, kultura e tradita, por është person për
t’u respektuar, me të drejta e me detyra, në veçanti, në fushën e punës, ku është
më i lehtë tundimi i shfrytëzimit, por edhe në fushën e kushteve konkrete të jetesës.
Dhuna nuk duhet të jetë për askënd rruga për zgjidhjen e vështirësive. Problemi është
para së gjithash njerëzor! Ju ftoj të shihni fytyrën e tjetrit e të zbuloni se ai
ka një shpirt, një histori e një jetë e se Zoti e do ashtu si do secilin prej nesh”. Një
reflektim të ngjashëm Papa ia kushtoi edhe njeriut e fesë së tij, duke u nisur nga
sulmet e fundit kundër të krishterëve në Egjipt e Malajzi: “Dhuna kundër të
krishterëve në disa vende shkaktoi indinjatën e shumë personave, edhe sepse u shfaq
në ditët më të shenjta për traditën e krishterë. Duhet që institucionet, si politike,
ashtu edhe fetare, të mos i harrojnë – e përsëris – të mos i harrojnë përgjegjësitë
e tyre. Nuk mund të ketë dhunë në emër të Zotit, e as që mund të mendohet të nderohet
Hyji duke fyer dinjitetin dhe lirinë e të afërmit”. Para se të fliste për emigrantët
e për të krishterët e persekutuar, Papa u ndal në domethënien e festës së djeshme
të Pagëzimit të Zotit. Një ngjarje, që siç tha Ati i Shenjtë, na sugjeron fort mirë
kuptimin global të festave të Krishtlindjes, gjatë të cilave elementi mbizotërues
është fakti që njeriu bëhet bir i Zotit përmes ardhjes së Birit të vetëm të Hyjit
në mesin e njerëzimit. Nga Pagëzimi, vazhdoi Papa, rrjedh edhe një model për shoqërinë,
që mund ta quajmë “shoqëria e vëllezërve”. Vëllazërimi, tha Benedikti XVI nuk mund
të vendoset me ideologji, e as me ndonjë dekret pushtetor: “Njihemi si vëllezër
duke u nisur nga vetëdija e përvujtë, por e thellë se jemi bij të të njëjtit Atë Qiellor.
Si të krishterë, falë Shpirtit Shenjt të marrë me Pagëzimin, na ka rënë dhurata e
impenjimi për të jetuar si bij të Zotit e si vëllezër, për të qenë “tharmi” i humanitetit
të ri, solidar dhe të pasur me paqe e shpresë”. Para lutjes së Engjëllit të
Tënzot, Papa u dha Sakramentin e Pagëzimit 14 të porsalindurve (shtatë meshkuj e shtatë
femra), gjatë një kremtimi eukaristik në Kapelën Sikstine në Vatikan. Është një ditë
e madhe për këta fëmijë, theksoi Benedikti XVI, i cili gjatë homelisë përshkroi krejt
historinë e Pagëzimit të Jezusit, që nga pritja e Shën Gjon Pagëzuesit e deri tek
përvujtëria me të cilën Biri i Zotit shkoi të lajë mëkatet si gjithë të tjerët. Në
të vërtetë, theksoi Ati i Shenjtë, Krishti mori mbi vete mëkatet e krejt njerëzimit
dhe e filloi misionin, duke e vënë veten pikërisht në vend të mëkatarëve. Kur pas
Pagëzimit, Jezusi doli nga uji, nënvizoi Papa, u hapën qiejt e vetë zëri i Atit u
tregoi njerëzve praninë e Birit të Tij në botë. Edhe për fëmijët e pagëzuar hapen
qiejt, vazhdoi Benedikti XVI, pasi Shpirti Shenjt do të banojë në ta si në një tempull,
duke ua shndërruar rrënjësisht zemrën: “Nga ky moment, zëri i Atit do t’i thërrasë
edhe ata për të qenë bij të tij në Krishtin e, në familjen e tij që është Kisha, do
t’i japë secilit dhuratën sublime të fesë. Kjo dhuratë, tani që nuk kanë mundësi të
kuptojnë plotësisht, do të ruhet në zemrën e tyre si një farë plot jetë, që pret të
zhvillohet e të sjellë fryte”. E Papa nuk mungoi të nënvizojë rolin vendimtar
të prindërve, të nunëve e të nunave, feja e të cilëve përfaqëson “premisën e nevojshme,
që Kisha t’u japë pagëzimin fëmijëve”. Me praninë e tyre, prindërit marrin përsipër
detyrën t’i edukojnë të vegjlit me fe: “Ata duhet të impenjohen ta ushqejnë
me fjalë e me dëshminë e jetës së tyre flakën e fesë tek fëmijët, që ajo të shkëlqejë
në këtë botë, e cila endet shpesh në humbëtirën e dyshimit, e t’i çojë dritën e Ungjillit,
që është jetë dhe shpresë”. Është karakteristikë e Pagëzimit, përfundoi Papa,
të shndrisë me dritën e Krishtit, t’iu hapë sytë njerëzve para shkëlqimit të Tij e
t’i shtyjë drejt misterit të Zotit përmes pishtarit të fesë. Vetëm kështu, besimtarët
shkojnë drejt një jete më të lumtur, më të bukur, më solidare, drejt një jete me Zotin.