Në Engjëllin e Tënzot Papa i fton besimtarët t’u përngjasin Mbretërve Dijetarë, model
i unitetit të arsyes me fenë.
(06.01.2010 RV)Në lutjen e Engjëllit
të Tënzot, Benedikti XVI vijoi të flasë për Mbretërit, kërkues të palodhshëm të së
vërtetës, duke kujtuar se ishin dijetarë që vrojtonin yjet e që njihnin historinë
e popujve. Megjithatë – nënvizoi Ati i Shenjtë - ata nuk e konsideronin dijen e tyre
të plotë; përkundrazi, ishin gjithnjë në kërkim të zbulimeve e të thirrjeve të reja
hyjnore: “Mund të kishin thënë: e dimë vetë gjithçka e s’ kemi nevojë të
na mësojë kush, duke lënë mënjanë, sipas mendësisë sonë të sotme, çdo ‘infektim’ të
shkencës nga Fjala e Zotit”. Mbretërit dëgjojnë profecitë dhe i pranojnë,
duke arritur harmoninë e përkryer ndërmjet kërkimit shkencor të njeriut e së Vërtetës
hyjnore. Si dijetarë të vërtetë, ia hapin zemrën misterit, që dëftohet në mënyrë mahnitëse,
duke konfirmuar plotësisht unitetin ndërmjet arsyes e fesë. Prej këndej, lutja
e Papës drejtuar Zojës së Bekuar: “Na ndihmoftë Virgjëra Mari, model i urtisë
së vërtetë, të jemi kërkues të palodhur të së vërtetës së Hyjit, të aftë ta jetojmë
gjithnjë përkimin e thellë ndërmjet arsyes e fesë, shkencës e zbulesës”. Pas
përfundimit të lutjes mariane, Benedikti XVI u drejtoi një urim të posaçëm vëllezërve
e motrave të Kishave Lindore, që e kremtojnë nesër Krishtlindjen: “Misteri
i dritës qoftë burim i gëzimit e i paqes për çdo familje e për çdo bashkësi”. Papa
kujtoi edhe më të vegjëlit, në Ditën e sotme misionare të fëmijëve, një nismë e cila
ka për qëllim t’i formojë me mendësinë solidare, që i nxit t’ia hapin zemrën mbarë
botës e t’i ndihmojnë bashkëmoshatarët, më pak fatlumtur.Së fundi, përshëndetja drejtuar
një numri të madh besimtarësh, posaçërisht të rinj, të Lëvizjes ‘Ndërmjet Nesh’ si
dhe pjesëmarrësve në karvanin historiko-folklorik tradicional ‘Rroftë Befana’, organizuar
sivjet nga qytezat laciale të Alatrit, Fiuxhit e Vikos, që u përshkua dy herë nëpër
Rrugën e Pajtimit, në procesionin drejt Sheshit të Shën Pjetrit e në kthim, gjithnjë
i duartrokitur nga mijëra njerëz në festë, në Shesh e në të dy anët e rrugës. Të gjithëve,
Papa u bëri urimin e përzemërt:
“U uroj të gjithëve gëzuar festën e
Dëftimit të Zotit!”.