Papa në Mbrëmësoret e para të Solemnitetit të Nënës së Zotit: “Biri i Hyjit është
dhurata më e madhe e burim i të gjitha dhuratave të tjera”.
(31.12.2009 RV)E filloi duke kujtuar ditën e fundit të vitit 2009 Papa homelinë
e Mbrëmësoreve të para të Solemnitetit të Nënës së Hyjit: një vit i pasur me ngjarje
për Kishën e për botën, dhe i ftoi të gjithë t’i lartojnë Zotit të kohës e të historisë,
himin e falënderimit! Gjatë shpjegimit të leximeve biblike, duke u ndaluar posaçërisht
tek fragmenti nga Letra e Shën Palit drejtuar Galatasve, Benedikti XVI nënvizoi misterin
e afërsisë së Zotit me mbarë njerëzimin, mister tipik i Krishtlindjes: Hyji bëhet
bir i njeriut e njeriut i jepet mundësia e padëgjuar të bëhet Bir i Hyjit. Kjo
na mbush plot me gëzim e na nxit t’i lartojmë me gjithë zemër Zotit himnin e lavdisë
– ishte ftesa e Papës - i cili në vijim u kujtoi të gjithë besimtarëve se janë të
thirrur ta falënderojnë Zotin me zë, me zemër e me gjithë jetën e tyre, për dhuratën
e madhe që u bëri, Birin e vet, prej nga burojnë të gjitha dhuratat e tjera, me të
cilat dashuria hyjnore e mbush plot jetën tonë, të familjeve, të bashkësive, të Kishës
e të botës. “Kënga ‘Te Deum’, që sonte jehon ndër Kisha, në të katër anët e
botës, është shenjë e mirënjohjes plot gëzim, që i shprehim Zotit për atë që na dhuroi
në Krishtin. Vërtetë, nga begatia e tij ne të gjithë morëm hire e përmbi hire”. Më
pas Benedikti XVI, duke ndjekur traditën e përvitshme, kujtoi kryesisht hiret, që
pati në vitin 2009 dioqeza i tij e Romës. U ndalua, prandaj, gjatë, tek rruga e përshkuar
gjatë vitit që kaloi, por edhe tek ajo, që hap para besimtarëve një vit i ri, plot
me ngjarje të panjohura: të pritura e të papritura. Papa foli me entuziazëm për vënien
në jetë të programit të dioqezës, përmes një veprimtarie kapilare, që depërton në
të gjitha sferat e jetës shpirtërore, duke nisur nga dy fusha themelore për Kishën:
kremtimi i Meshës të së dielës dhe dëshmimi i dashurisë së krishterë, pa harruar punën
baritore me familjet e me të rinjtë, që të mund ta ndërtojnë jetën e tyre mbi shkëmb.
Kujtoi, më pas, 26 majin e kaluar, kur mori pjesë në takimin dioqezan të Shën Gjonit
në Lateran e edhe mbledhjen, organizuar nga Vikariati, që do të mbahet në marsin
e ardhshëm. Një vit kalon, një tjetër shpalos ditë të reja e ngjarje të reja.
Po njeriu, në rrjedhë vitesh, vijon t’i bëjë vetes të njëjtat pyetje mbi jetën, në
kërkimin e përhershëm për të kuptuar të vërtetën e zanafillës e të cakut të vet të
fundmë, përgjigjet e të cilave – kujtoi Benedikti XVI – mund t’i gjejë vetëm duke
kundruar misterin e Fjalës së mishëruar. Prandaj Kisha në Romë e në botë impenjohet
të promovojë zhvillimin e gjithanshëm të njeriut – tha Papa - duke theksuar, në vijim,
se për të qenë dëshmitarë bindës të së vërtetës mbi njeriun, duhet dëgjuar, në lutje,
Fjala e Zotit. Për këtë është e nevojshme lectio divina, praktikë e lashtë, që duhet
bërë pjesë kryesore e baritorisë së zakonshme. E kjo, sepse: “Fjala
e Zotit, e besuar, e kumtuar dhe e jetuar, na nxit të veprojmë me frymën e solidaritetit.
Duke lavdëruar Zotin për ndihmën bujare, dhënë nga bashkësitë e krishtera atyre që
u trokitën në portë – theksoi Ati i Shenjtë – dëshiroj t’i inkurajoj të gjithë
të vijojnë veprimtarinë për lehtësimin e gjendjes së shumë familjeve të prekura nga
kriza ekonomike e nga papunësia”. Më pas Papa vijoi të kujtonte se botën mund
ta shndërrojë vetëm dashuria e Hyjit: “Lindja e Zotit, që na kujton se Hyji
erdhi të na shpëtojë, pa na kërkuar asgjë si shpërblim, duke marrë natyrën tonë e
duke na dhuruar natyrën e vet hyjnore, mund ta ndihmojë çdo njeri vullnetmirë të kuptojë
se vetëm duke ia hapur zemrën dashurisë hyjnore, sjellja njerëzore ndryshon, shndërrohet,
bëhet tharm i një ardhmërie më të mirë për të gjithë. E që një shndërrim i
tillë të kthehet në realitet – Papa kujtoi se Roma e bota kanë nevojë për meshtarë
që, duke qenë kumtues guximtarë të Ungjillit, i tregojnë njëkohësisht botës fytyrën
e mëshirshme të Atit hyjnor. I ftoi, prandaj, të rinjtë, t’ia dhurojnë pa frikë jetën
e tyre Zotit, duke ecur në rrugën e meshtarisë.Ndërsa i japim lamtumirën një viti
e dëgjojmë hapat e para të vitit të ri – kujtoi në përfundim Papa – liturgjia e sotme
na prin drejt Solemnitetit të Marisë, Nënë e Hyjit e nënë e të gjithë neve. Iu lut,
prandaj, Zojës së Bekuar të na shoqërojë me kujdesin e saj amtar sot e përgjithmonë,
që Krishti të na pranojë një ditë në lumninë e tij, në shoqërinë e shenjtorëve, për
të kënduar një ‘Te Deum’ të amshuar.