Rabini Di Senji: vizita e Papës në Sinagogën e Romës, etapë themelore e dialogut.
(0.12.2009 RV)Vijojnë përgatitjet
për vizitën e Papës në Sinagogën e Romës, më 17 janarin e ardhshëm, me rastin e Ditës
për dialogun hebraiko-kristian. Është e treta sinagogë që viziton Benedikti XVI, pas
asaj të Këlnit, në vitin 2005 e të Park East të Nju Jorkut, në vitin 2008. Menjëherë
pas zgjedhjes në fronin e Shën Pjetrit, Benedikti XVI pati treguar, me një mesazh
drejtuar Kryerabinit të Romës, Rikardo Di Senji, vullnetin për të vijuar, me ndihmë
të Tejetlartit, dialogun e për të forcar bashkëpunimin me bijtë e bijat e popullit
hebraik. Ngjarja do të zhvillohet 24 vjet pas vizitës historike të Gjon Palit II në
Sinagogën e Romës, më 13 prill 1986. Po me ç’frymë përgatitet ta presë Papën bashkësia
hebraike e Romës? Të dëgjojmë vetë Rabinin Di Senji, në mikrofonin tonë:
Përgjigje:
- Me vetëdijen se është një ngjarje e rëndësishme, një etapë themelore për dialogun,
e edhe me frymën e pritjes për gjithçka mund të sjellë në perspektivën e klimës së
përgjithshme.
Pyetje: - Ç’ të reja solli në marrëdhëniet ndërmjet hebrenjve
e katolikëve vizita e Gjon Palit II, më 13 prill 1986?
Përgjigje: -
Kryesisht shembjen e murit të mosbesimit: e ndjemë thellë këtë, në mënyrë të prekshme,
në rrjedhë vitesh. E vizita e Benediktit XVI do të jetë, para së gjithash, një gjest
që flet për vazhdimësi.