Në Engjëllin e Tënzot, Papa bëri thirrje për ta ndihmuar familjen e u lut për familjet
në vështirësi.
(28.12.2009 RV)Nëfestën
e Familjes Shenjte, gjatë lutjes së Engjëllit të Tënzot përballë mijëra shtegtarëve,
mbledhur në Sheshin e Shën Pjetrit, Papa bëri përsëri thirrje për ta ndihmuar e për
ta promovuar familjen e bazuar mbi martesën ndërmjet burrit e gruas. Ripohoi, më pas,
se bijtë janë dhuratë e Zotit e jo pronë e prindërve dhe u lut, në mënyrë të posaçme,
për familjet në vështirësi. Më pas, në lidhje video, përshëndeti pjesëmarrësit në
Festën e Familjes Shenjte, në Madrid.
Benedikti XVI i ftoi të gjithë ta kundrojnë
skenën e barinjve që, në Shpellën e Betlehemit, kanë përballë jo vetëm Foshnjen Hyjnore,
por një familje të vogël: nënën, babain e ferishten e sapolindur. Hyji – nënvizoi
– deshi të dëftohej, duke lindur në një familje njerëzore e prandaj familja njerëzore
u bë ikonë e Zotit: “Hyji është Trini, është bashkim dashurie, e familja,
me gjithë dallimin ndërmjet misterit hyjnor e krijesës së tij njerëzore, është shprehje,
që pasqyron misterin e pamatshëm të Hyjit-Dashuri. Burri e gruaja, të krijuar sipas
shembëlltyrës së Zotit, bëhen, në martesë, ‘një trup i vetëm”(Zn 2,24), domethënë, një bashkim dashurie, që lind jetën e re. Familja njerëzore,
në një farë kuptimi, është ikonë e Trinisë, përmes dashurisë ndërmjet anëtarëve të
saj e fekonditetit të dashurisë”. Më pas Papa komentoi Ungjillin e djeshëm,
i cili na kujton sesi Jezusi 12 vjeçar, mbetet në Tempull, në Jeruzalem, pa dijeninë
e prindërve. Nënës, që i kërkon shpjegime, Jezusi i përgjigjet se duhet të merret
me gjërat e Atit të tij: “E ne pyesim: kush ia kishte mësuar Jezusit dashurinë
për ‘gjërat’ e Atit? Sigurisht, si Bir, ai pati njohje intime me Atin, pati lidhje
të thellë vetjake, të përhershme, me Atin e vet, por në kulturën e tij konkrete, natyrisht
i mësoi nga prindërit lutjet, dashurinë për Tempullin e për institucionet e Izraelit.
Mund të pohojmë, prandaj, se vendimi i Jezusit për të ndenjur në Tempull, ishte kryesisht
fryt i lidhjes së tij të ngushtë me Atin, por edhe fryt i edukatës që kishte marrë
nga Maria e Jozefi.”. Këtu – vijoi Papa – mund të vërejmë kuptimin e vërtetë
të edukatës së krishterë, si fryt i bashkëpunimit ndërmjet edukatorëve e Zotit: “Familja
e krishterë është e vetëdijshme se fëmijët janë dhuratë, sipas planit të Zotit. Gjithsesi,
nuk mund t’i shikojë si pronë vetjake, por duke i shërbyer përmes tyre këtij plani,
është e thirrur t’i edukojë në lirinë më të plotë, liri e njeriut i cili i thotë Zotit
‘po’, për të bërë vullnetin e tij. Shembulli më i përkryer i këtij pohimi, është Virgjëra
Mari. Asaj ia besojmë të gjitha familjet, duke u lutur posaçërisht për misionin e
tyre të çmuar edukativ”. Papa u drejtoi një përshëndetje të posaçme, në
gjuhën spanjolle – në lidhje video – pjesëmarrësve në festën e Familjes Shenjte, në
Madrid: “Dios, habiendo venido al mundo en el seno de una familia, manifiesta... Zoti,
duke ardhur në botë në gjirin e një familjeje, tregon se ky institucion është udhë
e sigurtë për ta takuar e për ta njohur… Prandaj një nga shërbimet më të mëdha, që
ne, të krishterët, mund t’u bëjmë të tjerëve, është të japim dëshminë tonë, të qartë
e të vendosur, në mbrojtje të familjes së bazuar mbi martesën ndërmjet një burri e
një gruaje, duke e mbrojtur e duke e promovuar, me që një institucion i tillë ka
rëndësinë më të madhe për të sotmen e për të ardhmen e njerëzimit. Në të vërtetë
familja është shkolla më e mirë, ku njeriu mëson t’i jetojë ato vlera, të cilat i
japin dinjitet individëve e i bëjnë të mëdhenj popujt. Në të ndahen bashkë dhimbje
e gëzime; provohet ngrohtësia e dashurisë, që mbretëron në shtëpi, për të vetmen arsye
se aty banojnë anëtarë të së njëjtës familje. I lutem Zotit që në vatrat tuaja të
ndjehet gjithnjë fryma e përkushtimit dhe e besnikërisë së plotë, të cilën Jezusi
e solli në botë me lindjen e tij, duke e ushqyer e duke e forcuar këtë frymë me lutjen
e përditshme, me praktikimin e vijueshëm të virtyteve, mirëkuptimin reciprok e respektin
e anasjelltë”. Në përfundim Papa iu drejtua shtegtarëve italianë, mbledhur
në Sheshin e Shën Pjetrit: “Në këtë të diele të Familjes Shenjte, uroj përzemërsisht
të gjitha familjet e Romës e të mbarë Italisë, duke e shoqëruar urimin me një lutje
të posaçme për ata që kalojnë çaste të vështira. Zoti ju bekoftë!”.