Маем час Калядаў, і самазразумела, дзейнасць Святога Айца ў гэты перыяд ёсць вельмі
багатаю. І так у чацвер 24-га снежня, а гадзіне 22-й рымскага часу, Папа адслужыў
у Базыліцы Святога Пятра Святую Імшу ў вігілію Божага Нараджэння, так званую Пастэрку.
Перад ейным адпраўленнем дайшо да непрыемнага інцыдэнту. Як мяркуецца псіхічна хворая
жанчына з падвойным грамадзянствам: італьянскім ды швейцарскім Сусана Маёлё, кінулася
на Папу. Ва ўзніклай мітусні Бэнэдыкт 16 не ўтрымаўся на нагах і ўпаў. Яму адразу
ж дапамаглі падняцца, і ён без якіх-небудзь праблем на чале ўрачыстай працэсіі прыйшоў
да алтара Базылікі і ўзначаліў набажэнства. Па словах ксяндза Фэдэрыко Лёмбардзі,
Прэсавага Прадстаўніка Апостальскай Сталіцы, жанчына ня мела благіх намераў і, праўдападобна,
хацела толькі наблізіцца да Папы. У казанні, ў часе Імшы вігіліі Нараджэння Пана,
Бэнэдыкт 16 гаварыў аб далікатнасці Бога, Які набліжаецца да чалавека. У сваю чаргу
чалавек, каб убачыць пакорлівасць Стварыцеля, мусіць абудзіцца са сну, выйсці з крывадушнасці
ўласнага эгаізму і ўбачыць, што найважнейшым у жыцці ёсьць Бог. Дарогу, якая аддзяляе
нас ад Бога, сімвалізуюць постаці пастушкоў і мудрацоў з Усходу. Першыя неадкладна
ўстаюць і ідуць ў Бэтлеем; другія маюць перад сабою доўгую і ўскладненую дарогу. “Многія
з нас далёка жывуць ад Езуса Хрыста, ад Таго, які стаў чалавекам, які ад Бога прыйшоў
да нас. Мы жывём філазофіямі, інтарэсамі і заняткамі, якія поўнасцю нас захопліваюць
і ад якіх дарога да ясляў вельмі далёкая. Розным чынам Бог дапамагае нам адшукаць
дарогу да Яго”- дадаў Папа.