Benedikti XVI: Mesazhi i Krishtlindjes ‘Urbi et Orbi’(tekst i plotë).
25.12.2009 RV)Të dashur vëllezër e motra të Romës e të mbarë botës! E ju
të gjithë, burra e gra, që Zoti ju do! “Lux fulgebit hodie super nos, quia
natus est nobis Dominus”. “Sot përmbi ne do të shndrisë drita, sepse
lindi për ne Zoti”. (Meshari Romak, Lindja e Zotit, Mesha e Agimit,
Antifona e hyrjes)
Liturgjia e Meshës së Agimit na kujtoi
se tashmë nata kaloi, dita po shtyhet; drita që përhapet nga Shpella e Betlehemit
vezullon përmbi ne. Gjithsesi, Bibla e Liturgjia nuk bëjnë fjalë për dritë natyrore,
por për një dritë tjetër, të veçantë, e cila i lëshon rrezet e veta drejt ‘nesh’,
sepse pikërisht ‘për ne’ ‘lindi’ Foshnja e Betlehemit. E kur themi ‘ne’, kemi parasysh
Kishën, familjen e madhe universale të besimtarëve në Krishtin, që pritën me shpresë
lindjen e re të Shëlbuesit e që sot kremtojnë, në mister, aktualitetin e përjetshëm
të kësaj ngjarjeje. Në fillim, rreth grazhdit të Betlehemit, fjala ‘ne’ ishte pothuajse
e padukshme për sytë e njerëzve. Siç na rrëfen Ungjilli i Shën Lukës, përfshinte,
përveç Marisë e Jozefit, vetëm pak barinj të përvujtë, të cilët arritën tek Shpella
të lajmëruar nga Engjëjt. Drita e Krishtlindjes së parë qe si një zjarr i ndezur nëpër
natë. Gjithçka përreth ishte e zhytur në errësirë, ndërsa në Shpellë vezullonte drita
e vërtetë, që shndrit çdo njeri (Gjn 1,9). E pra gjithçka ndodh në thjeshtësi
e fshehtësi, sipas stilit me të cilin vepron Zoti në të gjithë historinë e shëlbimit.
Zotit i pëlqen të ndezë drita të kufizuara, për të ndriçuar, pastaj, hapësirat e
pafundme. E Vërteta, ashtu si Dashuria që përmban, ndizen atje, ku drita pranohet;
përhapën, pastaj, me rrathë koncentrikë, në zemrat e në mendjet e atyre që, duke i
hapur lirisht udhën shkëlqimit të saj, bëhen edhe vetë burim drite. Është historia
e Kishës, që nis shtegtimin në Shpellën e varfër të Betlehemit e, në rrjedhë shekujsh,
bëhet Popull e burim drite për njerëzimin. Edhe sot, përmes atyre që shkojnë ta takojnë
Foshnjen, Zoti ndez përsëri zjarre në natën e botës, për t’u bërë thirrje njerëzve
të shohin, në Jezusin, ‘shenjën’ e pranisë së tij shëlbuese e çliruese e për ta zgjëruar
atë ‘ne’ të besimtarëve në Krishtin, duke përfshirë në të, mbarë njerëzimin.
Kudo
është një ‘ne’ që e mirëpret dashurinë e Zotit, atje shkëlqen drita e Krishtit, edhe
në situatat më të vështira. Kisha, ashtu si Virgjëra Mari, i ofron botës Jezusin,
Birin, që ajo vetë e mori si dhuratë e që erdhi ta shpëtojë njeriun nga skllavëria
e mëkatit. Ashtu si Maria, Kisha nuk ka frikë, sepse ky Fëmijë është forca e saj.
Por ajo nuk e mban vetëm për vete: ua dhuron të gjithë atyre, që e kërkojnë me zemër
të sinqertë: të përvujturve të tokës e të pikëlluarve, viktimave të dhunës e të gjithë
atyre që kanë etje për paqe. Edhe sot, për familjen njerëzore, të tronditur thellë
nga kriza ekonomike, e më parë, nga ajo morale, si dhe nga plagët e dhimbshme të luftërave
e të konflikteve, me stilin e ndarjes së përbashkët e të besnikërisë ndaj njeriut,
Kisha përsërit, njëzëri me barinjtë: “Të shkojmë në Betlehem! (Lk 2,15), e
atje do të gjejmë shpresën tonë”. Kjo ‘ne’ e Kishës jeton atje, ku lindi Jezusi,
në Tokën Shenjte, për t’i ftuar banorët e saj ta lënë mënjanë logjikën e dhunës e
të hakmarrjes e të impenjohen, me forcë e bujari, në rrugën drejt bashkëjetesës paqësore.
‘Ne’ e Kishës është e pranishme në vende të tjera të Lindjes së Mesme. Si mund të
mos mendojmë për situatën tronditëse në Irak e për grigjën e vogël të të krishterëve,
që jeton në Zonë? Ajo nganjëherë pëson dhunë e padrejtësi e, megjithatë, është gjithnjë
gati të japë ndihmesën e vet për bashkëjetesën civile, në kundërshtim të plotë me
logjikën e ndeshjes e të mospranimit të të afërmit. ‘Ne’ e Kishës vepron në Sri Lanka,
në Gadishullin korean e në Filipine, e vepron edhe në trojet aziatike, si tharm i
pajtimit e i paqes. Në Kontinentin afrikan nuk pushon së lartuari zërin drejt Zotit
për t’i lypur përfundimin e çdo padrejtësie në Republikën Demokratike të Kongos;
i fton banorët e Guinesë e të Nigerit të respektojnë të drejtat e çdo njeriu e të
dialogojnë; atyre të Madagaskarit u kërkon t’i kapërcejnë përçarjet e brendshme e
ta pranojnë njëri-tjetrin; të gjithëve u kujton se janë të thirrur të shpresojnë,
pavarësisht nga dramat, provat e vështirësitë, që vijonë t’i trondisin. Në Evropë
e në Amerikën veriore ‘ne’ e Kishës i nxit njerëzit të ngrihen mbi mendësinë egoiste
e tekniciste, të punojnë për të mirën e përbashkët e të respektojnë njerëzit më të
ligshtë, duke filluar nga ata që nuk kanë lindur ende. Në Honduras ndihmon për rifillimin
e rrugës institucionale; në të gjithë Amerikën Latine ‘ne’ e Kishës është faktor identitar,
plot vërtetësi e dashuri, që asnjë lloj ideologjie nuk mund ta zëvendësojë, është
thirrje për respektimin e të drejtave të patjetërsueshme të çdo njeriu e të zhvillimit
të tij të gjithanshëm, kumt drejtësie e vëllazërimi, urim uniteti.
Besnike
ndaj mandatit të Themeluesit të saj, Kisha është solidare me ata, që tronditen nga
fatkeqësitë e natyrës e nga varfëria, edhe në shoqërinë e kamur. Përballë heksodit
të atyre që lënë trojet e veta e marrin rrugët e largëta, të shtyrë nga uria, intoleranca
ose nga degradimi ambiental, Kisha është prani, që bën thirrje për mikpritje. Me një
fjalë, Kisha kumton kudo Ungjillin e Krishtit, pavarësisht nga persekutimet, diskriminimet,
sulmet e indiferenca, nganjëherë armiqësore, që – madje - i krijojnë mundësinë të
ketë fatin e Mësuesit e të Zotit të saj.
Të dashur vëllezër e motra, sa dhuratë
e madhe është të bësh pjesë në një bashkësi, që u përket të gjithëve! Është bashkësia
e së Shenjtnueshmes Trini, nga zemra e së cilës zbriti në botë Emanueli, Jezusi, Zoti-me-ne.Ashtu
si barinjtë e Betlehemit, kundrojmë plot mahnitje e mirënjohje këtë mister dashurie
e drite! Për shumë vjet Krishtlindjen, të gjithëve!