Përkujtojmë jezuitin Patër Dedën e Madh në 162-vjetorin e ditëlindjes.
(21.12.2009 RV)E quajtën Patër Deda i madh jo vetëm sepse kishte shtat vigan,
por kryesisht sepse vigan e kishte shpirtin, kulturën, dashurinë, vëllazërimin. Për
ta përshkruar si duhet portretin e Atë Domeniko Pazit, misionar jezuit italian, duhet
të lexosh tre vëllimet e veprës monumentale "Albania". E, si ta kesh kryer së lexuari,
do të kujtohesh se jeta e këtij misionari të ndritur është krejtësisht e shkrirë me
jetën e popullit shqiptar. Ishte Pater Deda ai themeloi misionin e famshëm shëtitës
të jezuitëve, i cili i ngjitej shkrepave e majeve të maleve shqiptare, mbuluar me
dëborën e përjetshme e ulej rreth vatrave malësore, ku vrisnin njëlloj ngrica e arma,
për të zbutur jetën e për të pajtuar gjaqet. Rreth këtij misioni, kudo i shkelte
këmba, mblidheshin burra e gra, pleq e fëmijë, për të dëgjuar fjalën e Krishtit, për
të falur e për t'u pajtuar në emër të tij. Patër Deda jezuit e shkriu një pjesë të
mirë të jetës ndërmjet këtyre njerëzve, për t'u kthyer herë pas here në Kolegjin Saverian
të jezuitëve në Shkodër, ku kishte qenë i pari rektor e ku kishte botuar shumë tekste
për shkollat shqipe. Në netët e errëta të bjeshkëve, nën dritën e pishtarit, ai
ulej përdhé e shkruante mbresat e ditës, të ditëve, historinë e atij vendi e atyre
njerëzve të thjeshtë, të ngatërresave, armiqësive, gjaqeve, pajtimit e paqes që binte
ndër vatrat ku hynte Kryqi. Shkruante historinë e luftës e të paqes, të njerëzve e
të Kishës. Kur kthehej pastaj në Shkodër, e përpunonte materialin, të cilin sa qe
gjallë nuk mundi ta shihte të botuar. Duke ecur në gjurmët e tij, shkrimet e Patër
Dedës së Madh, i përpunoi dhe i botoi sivëllai rregulltar jezuit, Atë Fulvio Kordinjano,
duke na lënë trashëgim tre vëllimet e "Albanisë". Nuk është lehtë ta njohësh e ta
tregosh jetën e misionarit të madh jezuit po vërtetë meriton të njihet. Ne vetëm sa
e kujtuam sot, me mirënjohje të thellë, në 162 vjetorin e lindjes.