Krishti është dritë, duhet ta pranojmë plotësisht këtë mesazh, që përsëritet në shekuj
(21.12.2009 RV)Dëgjues të nderuar këtyre ditëve vazhdojmë përgatitjen tonë
shpirtërore për kremtimin e festës së Krishtlindjes. Sot duam të ndajmë bashkë me
ju një mendim të shkurtër e të thjesht shpirtëror. Pra, vetëm edhe pak ditë tashmë
na ndajnë nga festa e Lindjes së Krishtit, e këndej duhet të përshpejtojmë përgatitjen
e zemrës për t’i bërë në zemrën tonë VEND ZOTIT që po vjen . Festa e Krishtlindjes
na thotë se të gjithë kemi nevojë të kthehemi vazhdimisht tek misteri i Lindjes së
Krishtit, tek misteri i mishërimit të Dashurisë së Zotit, që të na hyjë në shpirt
deri në atë pikë e masë, sa të mund të themi se jemi vërtetë të krishterë, që do
të thotë të jemi njerëz të cilët e kanë aromën e Krishtit, njerëz që bartin e përhapin
e dashurinë jetëdhënëse në jetën e përditshme. Koha Kishtare e Ardhjes që tani
po përjetojmë e cila tashmë është përfundim e sipër, niset pikërisht nga Lindja e
Jezu Krishtit Zot, nga depërtimi i Jezusit në histori për të hapur brenda kësaj historie
njerëzore, të njollosur nga mëkati e të pushtuar nga errësira, një shteg shpëtimi
e rilindjeje në Emanuelin Zotit me ne. Ne e dimë se kjo tashmë ka ndodhur, se
Biri i Zotit, Jezu Krishti është mishëruar, se është bërë njeri, por shëlbimi që Ai
ka realizuar nuk ka përfunduar së përmbushuri, shëlbimi Hyjnor pra nuk është kryer
në mënyrë përfundimtare; shëlbimi Hyjnor ka filluar, si tharm, si fryt i parë e vazhdon
së realizuari, së mishëruari në historinë e përditshme njerëzore. Ne pra e presim
kthimin e Jezusit, që në mënyrë përfundimtare të përmbushet shëlbimi Hyjnor, që njerëzimi
të çlirohet plotësisht e përfundimisht nga pesha e fajit dhe bota të lirohet nga skllavëria
e mëkatit. Ne presim qiej të rinj e tokë të re, e ndërsa kujtojmë ardhjen e Jezusit
në histori, ndezim kandilin, apo më mirë të themi e mbushim me vaj – për të dalur
pastaj të përgatitur si duhet në takim me Zotin që vjen. Me këtë shpresë e me sigurinë
e lindjes së Krishtit ndër zemra, ta presim festën e Krishtlindjes.