(18.12.2009 RV)Shën Malakia profet është i fundmi i profetëve të vegjël të
Biblës. Prandaj izraelitët e quajnë “Vula e profetëve”. Pak e aspak dimë për jetën
e tij. Dihet vetëm se ishte nga fisi i Zabulonit e se lindi në Sofa. Besohet të ketë
jetuar pas internimit në Babiloni (538 para Krishtit), gjatë pushtimit persian. Gjithsesi
nuk mund të vërtetohet me saktësi në se profetizoi para, pas, apo njëkohësisht me
kthimin e Ezdrës, kryeprift hebre, kodifikues i judaizmit, në shekullin V-IV para
Krishtit. Meqenëse në Librat e Ezdrës e të Nehemisë, në Besëlidhjen e Vjetër,
nuk flitet për Malakinë, mund të arrijmë në përfundimin se ai duhet të ketë jetuar
pas tyre, ndoshta nga viti 519 deri në vitin 425 para Krishtit. Libri i Malakisë
trajton probleme morale, që lidhen me bashkësinë hebraike, të sapo kthyer nga mërgimi
babilonez, të cilën e qorton për ankimet kundër Provanisë Hyjnore, duke e nxitur të
pendohet. Ai vë në dukje se zgjedhja e Izraelit nuk është vetëm privilegj hyjnor
por, si çdo dhuratë hyjnore, ka edhe detyrime. I qorton, prandaj, ashpër priftërinjtë,
që e lënë pas dore dhe e fyejnë dinjitetin e Jahveut e kultin e Tij. Duke folur
për zakonet e kohës, dënon martesat e përzjera e mbron pazgjidhshmërinë e martesës. Libri
përfundon me vegimin eskatologjik të fundit të botës. Profeti paraflet edhe ardhjen
e lajmëtarit të Zotit, që do t’i shoshitë të mirët e popullit të vet. Mendohet se
me këtë profeci paralajmëron ardhjen e Gjon Pagëzuesit. Etërit e Kishës janë një
mendjeje kur e shikojnë Malakinë si parafolës profetik të flijes së Meshës, të Jeruzalemit,
që e humbet titullin ‘vend ku duhet adhuruar”, e të Jezusit, që e themelon ritin eukaristik
për mbarë njerëzimin. Në librin e Malakisë shprehet me forcë mendimi se drejtësia
e Zotit nuk ndryshon e se feja e vërtetë është universale.