Çelësi i fjalëve të Kishës: ç’është Krishtlindja për ne?
(17.12.2009 RV)Të dashur dëgjues, po afrohet Krishtlindja e sëbashku me rubrikën
tonë të veçantë për këtë periudhë, nuk mund të mos merremi edhe me fjalët që e rrethojnë
këtë festë, e cila është lindja e Krishtit, por edhe lindja e njeriut të ri brenda
nesh, është edhe rinovimi i jetës. Të pyesim pra: ç’është Krishtlindja për ne?
Krishtlindja
nuk është festuar gjithnjë nga bota e krishterë, edhe pse nuk dihet me saktësi data
e lindjes së Foshnjes Hyjnore. 25 dhjetori ka zëvendësuar një festë pagane romake,
që kremtonte Zotin Diell e që njihej si dita e lindjes së Zotit të Pathyeshëm. Qe
perandori Kostandin, që e pranoi i pari krishterimin, ai që zëvendësoi festën pagane,
shumë të njohur nga popullsia, me kultin e krishterë të lindjes së Jezusit. E duhet
të presim vitin 336, që kjo festë të njihet botërisht e t’i jepet e njëjta rëndësi
si festës së Ujit të Bekuar, që kishte ardhur më herët nga Lindja në Perëndim. Por
vetëm nën perandorin Justinian, pra në vitet 527-565, kjo festë do të njihet ligjërisht. Krishtlindja
lidhet me traditën, pasi pikërisht në këtë ditë, të krishterët festojnë ardhjen e
Dritës së Botës, për të mundur errësirën. E Foshnja Hyjnore që vjen në Tokë përuron
një jetë të re dhe u sjell Dritën të gjithë njerëzve. Lindja e Krishtit është kështu
maja e dashurisë së Zotit për krijesën e tij, njeriun. Jezusi “ia mohoi vetvetes
hyjninë e mori natyrën e shërbëtorit dhe u bë i ngjashëm me njerëz” (Fil 2:7).
“Duke qenë i pasur, u bë për ne i varfër, që ne të bëhemi të pasur me anë të varfërisë
së tij” (2Kor 8:9). Ardhja e Krishtit në këtë botë ka si qëllim “të shkatërrojë
veprën e djallit”, siç thuhet në Letrën e parë të Gjonit e në Librin e Zanafillës
(3:8b; 3:15). Ja shkurtimisht se ç’do të thotë Krishtlindje nëse duam t’i qëndrojmë
besnikë Fjalës së Zotit. Asnjë sentimentalizëm, asnjë poezi, asnjë koreografi apo
traditë të mos e fshehë fytyrën e vërtetë të Lindjes së Jezusit. Për këtë, pa
dyshim duhet zhveshur Krishtlindja moderne nga të gjitha mësimet e gënjeshtërta, që
mundohen t’u fusin në kokë besimtarëve, nga më i madhi tek më i vogli. Pema e krishtlindjes,
që vjen nga kulti i zotit gjerman Odini, mund të zbukurojë shtëpitë, ashtu siç mbush
pyjet e korishtet, ose shpella e Betlehemit mund të ketë edhe kaun e gomarin, marrë
nga ungjilli apokrif i pseudo Mateut, por kujtimi i Lindjes së Krishtit nuk duhet
kthyer në rast për t’u argëtuar, siç bën fëmija me kukullat e veta, e as për të ridimensionuar
figurën e Jezusit, duke e shndërruar në një foshnjë të pambrojtur, që e lë veten thjesht
të përkundet. Krishtlindja është festa e Zotit të gjallë.