Nënë Tereza model për t’u imituar. Mesazhi i ipeshkvijve të Shqipërisë për Krishtlindje
(17.12.2009 RV)Ftesa drejtuar katolikëve
që të shohin në Foshnjën Hyjnore “lindjen e njeriut të ri”, që të shoqërojnë me lutje
meshtarët dhe të impenjohen të ndjekin në jetë shembullin e Nënë Terezës, së Lumes
shqiptare të bamirësisë, “shembull i respektit për jetën dhe i kujdesit për nevojtarët”,
e së fundi, ftesa drejtuar politikanëve që të gjejnë rrugën e dialogut për zgjidhjen
e problemeve: ky është thelbi i mesazhit të Konferencës Ipeshkvnore të Shqipërisë
për Krishtlindjen e sivjetme. Për t’u theksuar se ky mesazh ka pasur jehonë të gjerë
në agjensitë e ndryshme katolike e sot shkruan për të edhe gazeta e Vatikanit “L’Osservatore
Romano”. “Pranojeni këtë të vërtetë për njeriun – shkruajnë ipeshkvijtë –
të vërtetën e zbuluar në fshehtësinë, në heshtjen e në thjeshtësinë e Natës së Krishtlindjes.
E vërteta është kjo: nuk mund të ekzistojë njeriu pa Zotin. Njeriu nuk mund të mohojë
Zotin, pa mohuar vetveten”. Me rastin e Vitit Meshtarak, prelatët shqiptarë
u kërkojnë besimtarëve të luten për meshtarët, “që të përforcuar në Zotin të bëhen
meshtarë të shenjtë”, si edhe për thirrjet e reja për meshtarë e rregulltarë. Ipeshkvijtë
theksojnë se meshtarët duhet ta shpallin Ungjillin, para së gjithash, me dëshminë
e jetës. Nënë Tereza, e cila në vitin 2010 do të mbushte 100 vjeç, është shembulli
që duhet ndjekur, pasi “i ka kujtuar shoqërisë së sotme anonime se çdo njeri ka dinjitet
të patjetërsueshëm”. Pjesa e fundit e mesazhit përmban një thirrje për politikanët
që të zgjedhin rrugën e dialogut për të zgjidhur kundërshtitë. “Polarizimi politik,
kur bëhet shkak për ndarje, është një e keqe që duhet kapërcyer”, pohojnë ipeshkvijtë,
për të cilët “dashuria për atdheun duhet të tejkalojë interesat e partive” dhe “impenjimi
për të mirën e përbashkët duhet të shkojë përtej çdo ideologjie politike”. Duke marrë
si shembull bashkëjetesën paqësore ndërmjet feve, prelatët i ftojnë politikanët të
kërkojnë ç’është e dobishme për popullin dhe të tregojnë respektin e duhur ndaj njëri-tjetrit
në debate e konfrontime, pa përdorur fjalor ofendues, jo të përshtatshëm për ata që
përfaqësojnë popullin. “Njerëzit kanë të drejtë të shohin tek ju një model në sjellje”
përfundon mesazhi i Kishës së Shqipërisë. Pikërisht ky është argumenti i intervistës
së kryeredaktorit tonë, don David Gjugja me zëdhënësin e Konferencës Ipeshkvnore të
Shqipërisë, don Gjergj Meta. Ta dëgjojmë