Benedikti XVI në audiencën e përgjithshme: politika e mediat nuk duhet të jenë skllevër
të relativizmit etik, por t’ia hapin zemrën së vërtetës dhe dashurisë së Zotit.
16.12.2009 RV)Në epokën tonë shikojmë
një shkëputje shqetësuese ndërmjet arsyes, që ka për detyrë të zbulojë vlerat etike
të lidhura me dinjitetin e njeriut - e lirisë, që ka për detyrë t’i promovojë. Në
audiencën e sotme të përgjithshme, mbajtur në Sallën e Palit VI në Vatikan, në praninë
e nëntë mijë besimtarëve e shtegtarëve, Benedikti XVI foli përsëri për diktaturën
e relativizmit, duke u bazuar mbi shkrimet e një teologu të lashtë të Mesjetës, Gjonit
të Salisbëri-t. Papa ripohoi se zhvillimi i vërtetë i shoqërisë nuk është ‘prodhim’
i njeriut, por e ka rrënjën në planin e dashurisë së Zotit për krijesat e veta.
Nëntëqind
vjet më parë, një mendimtar i rëndësishëm i Mesjetës, ipeshkvi i Shartrë, Gjoni i
Salisbëri-t, që jetoi ndërmjet viteve 1100 e 1180, pohonte se ligjet njerëzore dhe
veprimtaria politike duhet të përshtaten me ligjin natyror, që i njeh çdo njeriu të
drejta të patjetërsueshme, të cilat nuk mund të shfuqizohen. Megjithatë – vërejti
Papa – një mijë vjet të kaluara me këtë vetëdije, nuk arritën ta sigurojnë gjithnjë
shkallën e duhur të respektit për njeriun, gjë që e vërtetojnë praktikimi i abortit,
pranimi i eutanazisë, eksperimentet gjenetike, sulmet kundër dinjitetit të familjes.
Në se në Enciklikën “E vërteta, thënë me dashuri” Papa pohonte se veprimtaria
shoqërore dhe politika nuk duhet të shkëputen kurrë nga e vërteta objektive mbi njeriun
e mbi dinjitetin e tij, sipas Gjonit të Salisbëri-t - shpjegoi Benedikti XVI: “Ekziston
(…) edhe një e vërtetë objektive, e pandryshueshme, me zanafillë tek Zoti, që mund
të pranohet nga arsyeja njerëzore e që ka të bëjë me veprimtarinë praktike dhe shoqërore.
Është fjala për të drejtën natyrore, nga e cila duhet të frymëzohen ligjet njerëzore
dhe autoritetet politike e fetare, në se duan t’i shërbejnë së mirës së përbashkët”. Një
mendim tejet aktual ky, ndonëse, për fat të keq – vërejti Benedikti XVI – sot kanë
mbetur gjurmë tejet të zbehta nga ajo drejtësi, që sipas ipeshkvit mesjetar, donte
të thoshte t’ia njohësh çdo njeriu të drejtat e tij. “Në kohën tonë, posaçërisht
në disa vende, vërejmë një farë shkëputjeje shqetësuese ndërmjet arsyes, që ka për
detyrë të zbulojë vlerat etike lidhur me dinjitetin e njeriut, e lirisë, që e ka për
detyrë t’i pranojë e t’i promovojë”. Po të ishte ende gjallë - tha Benedikti
XVI – Gjoni i Salisbëri-t do të na kujtonte sot se në përkim me drejtësinë janë vetëm
ato ligje, që mbrojnë shenjtërinë e jetës njerëzore, që i kundërvihen ligjërimit të
abortit, të eutanazisë, eksperimenteve gjenetike, të cilat s’duan t’ia dinë se ka
kufij të pakapërcyeshëm. E jo më pak, ato ligje, të cilat respektojnë dinjitetin e
martesës së burrit me gruan, frymëzohen nga laiciteti konkret i shtetit–laicitet që
kërkon gjithnjë mbrojtjen e lirisë fetare e vë në plan të parë parimin e ndihmës
e të solidarietit, në nivel kombëtar e ndërkombëtar: “Përndryshe, do të shkonim
drejt asaj, që Gjoni i Salisbëri-t e quan ‘tirania e princit’, ndërsa ne, ‘diktatura
e relativizmit’: një relativizmi që, siç e kam kujtuar pak vjet më parë, nuk pranon
asgjë si përfundimtare e ka si masë kryesore vetëm vetveten, unin e dëshirat e tij”. E hija e relativizmit etik, që i prodhon këto pasoja, shtrihet edhe mbi mjetet
e komunikimit, mesazhet e të cilave – theksoi Papa – janë gjithnjë më larg nga ajo
urti, për të cilën bota ka nevojë gjithnjë më urgjente: Në përfundim
Papa theksoi se burimi i fundmë, nga i cili duhet të frymëzohet çdo sferë e veprimtarisë
njerëzore, është Zoti. E Zoti është vërtetësi e dashuri: “Ky parim është
tejet i rëndësishëm për shoqërinë e për zhvillimin, sepse as njëra as tjetri nuk mund
të jenë vetëm produkte të njeriut; edhe vetë dëshira e njerëzve dhe e popujve për
zhvillim, nuk bazohet mbi vendime njerëzore, por është e shkruar në një plan, që
na paraprin. Prandaj e kemi për detyrë të gjithë ta pranojmë me vullnet të lirë”. Në
çastin e përshëndetjeve përfundimtare, Benedikti XVI kujtoi posaçërisht pjesëmarrësit
në shtegtimin e organizuar nga shoqata ‘Vëllazëria”, shoqëruar nga kardinali Enio
Antoneli, kryetar i Këshillit Papnor për Familjen e nga ipeshkvi i Kremës, Oskar Kantoni.
Ju inkurajoj – u tha Papa – t’i dëshmoni me impenjim gjithnjë më të madh, vlerat e
mikpritjes e të solidaritetit, posaçërisht për fëmijët e për familjet, që kalojnë
çaste të vështira.