Біскуп Уладыслаў Блін прыняты ў Супольнасьць Айцоў Марыянаў як "далучаны сябра"
Ва ўрачыстасць Безаганнага Зачацця Найсвяцейшай Дзевы Марыі – 8 снежня
2009 г., у капліцы Генеральнага дому Айцоў Марыянаў у Рыме, Біскуп Віцебскі Ўладыслаў
Блін быў прыняты ў Закон Айцоў Марыянаў як “далучаны сябра” (vir aggregatus). На
рукі Генеральнага Настаяцеля а. Яна Мікалая Рокаша MIC Біскуп Уладыслаў склаў абяцанне
выконваць абавязкі, запісаныя ў Канстытуцыях Закону, і кіравацца духоўнасцю Закону
Марыянаў у сваёй паслузе Касцёлу. Літургічнае прыняцце ў Закон адбылося ў рамках
заканчэння Юбілейнага Году святкавання 100-годдзя Аднаўлення Закону Айцоў Марыянаў.
На
падставе ўласнага манаскага права Закон Айцоў Марыянаў прымае мужчынаў, які прагнуць
духоўна далучыцца да рэалізацыі місіі Закону ў Касцёле. Яны атрымліваюць статус “далучанага
сябра” і ўдзельнічаюць у пладах малітваў і працы сяброў Супольнасці. Да іх абавязкаў
належыць між іншым, згодна з харызмай Закону, распаўсюджванне асаблівага шанавання
Найсвяцейшай Дзевы Марыі Беззаганна Зачатай, а таксама шчырая малітва за душы, якія
церпяць у чысцы.
Як падкрэсліў у сваім Слове Біскуп Уладыслаў Блін, ягонае
святарскае пакліканне сфармавалася дзякуючы паслузе выбітных марыянаў. Санктуарыум
Маці Божай у Ліхені (Польшча), да якога малады Ўладыслаў ад маленства хадзіў ў пілігрымку
з блізкага Слесіна (дзе жылі ягоныя бацькі пасля пераезду з Беларусі), быў заўжды
месцам ягонага духоўнага ўмацавання.
Ужо 10 гадоў Біскуп Уладыслаў Блін з’яўляецца
ардынарыем Віцебскай дыяцэзіі, на тэрыторыі якой, у Друі, знаходзіцца першы манастыр
беларускіх марыянаў, заснаваны ў 1923 годзе Блаславёным Біскупам Юрыем Матулевічам,
Аднавіцелем Закону. На тэрыторыі гэтай жа Віцебскай дыяцэзіі знаходзіцца таксама
Санктуарыум Айцоў Марыянаў у Росіцы – на месцы, дзе ў 1943 г. марыяне – Блаславёныя
Антон Ляшчэвіч і Юрый Кaшыра – панеслі пакутніцкую смерць, несучы пастырскую паслугу
верным у драматычны час вайны.