Rubrika “Shtigjeve të Krishtlindjes”: “Mbretëria është fare pranë”.
(05.12.2009 RV)Rubrika “Shtigjeve të Krishtlindjes”, në emisionin gjashtë,
na kujton se ditët kalojnë e Festa e madhe afrohet. Nuk është fjala vetëm për festën
tokësore. Një festë tjetër na pret të gjithëve. Është më e ndritshme se të gjitha
festat e jetuara mbi këtë tokë. Mund të marrim pjesë në të përgjithmonë, në se punojmë
me të gjitha forcat për Mbretërinë qiellore. Çdo njeri e ka vërtetë pranë, sado gjatë
të jetojë. Mbretëria është afër!
“Zoti na fton të gjithëve të
punojmë për Mbretërinë e tij, si të mundemi e si të dimë. Gjithçka
është në pritje… Porse dikush përsëri duhet ta lëshojë
kushtrimin!”. E Ungjilli na
kujton:
“Të korrat janë të mëdha Kurse punëtorë ka pak”. (Mt.
9, 37)
“Mbretëria është pranë! Po, ju e dini, afër
është mbretëria dy hapa larg edhe kur duket në skaj të botës... Deri dje
korrësit ndër t’korra ishin turmë. Ishin kudo, mes grurit të artë. Deri
dje Kisha ishte në mes të katundit! Secili e dinte vendin e vet në shtëpinë
e Zotit. Vendin e vet e kish secili: mësuesi, në shkollë, e prifti në famulli! E
fjala u zinte vend. Po sot të duket se fjala më s’ka zë, ndoshta pse ai që
flet vendin ku e ka s’e di! Ta lusim, pra të zotin e të korrave, vendin e
vet ta gjejë gjithësecili. Ti, i pagëzuar, duhet ta gjesh i pari vendin tënd. Duhet
ta gjejmë të gjithë vendin që na përket që të mos ulen me sherr dy vetë në
të njëjtin vend, a të mbeten vendet bosh. A s’jemi fis barinjsh? Shikoni,
kullota është pa fund. Barinjtë, në pritje të një dite të re!”.