Thirrje e jezuitëve: ndal përdorimit të fëmijëve ushtarë në Kolumbi
(03.12.2009 RV)Kolumbia vazhdon të shkatërrohet nga lufta civile. Ndeshjet
e ditëve të fundit ndërmjet ushtrisë dhe guerrilasve të FARC-ut kanë shkaktuar shumë
viktima. Sipas të dhënave të UNICEF-it, luftëtarët e vendit latinoamerikan arrijnë
në 17 mijë vetë. Shumë prej tyre janë fëmijë. Shërbimi i Jezuitëve për Refugjatët
e ka ngritur zërin pikërisht për ta, duke bërë një thirrje të fuqishme që të ndalet
përdorimi i të vegjëlve në konflikt. Mbi këtë fenomen dramatik, intervistuam koordinatorin
ndërkombëtar të komunikimit në Shërbimin e Jezuitëve për Refugjatët, Xhejms Stepllton: Një
pjesë shumë e rëndësishme e këtyre grupeve që luftojnë përfaqësohet nga të mitur:
mesatarisht një ndër katër guerrilas është nën 18 vjeç. Në këto rrethana, duhet sensibilizuar
popullsia mbi problemin, sepse vërtet që gjatë viteve të fundit është ulur numri i
fëmijëve ushtarë, por është ulur edhe mosha e atyre që përdoren si të tillë, nga 13
në 12 vjeç. Deri pak kohë më parë, lufta ishte vetëm kolumbiane, por tani është më
e përgjithshme. Shumë vetë janë larguar nga Kolumbia për të shpëtuar fëmijët nga lufta,
por tani, nëpër kampet e refugjatëve e në vendet fqinjë, rrezikojnë të përdoren si
ushtarë jo vetëm fëmijët kolumbianë, por edhe të tjerët.