Papa në Engjëllin e Tënzot: bota ka nevojë për shpresë e shpresa gjindet vetëm në
Krishtin.
(30.11.2009 RV)Është Koha e Ardhjes:
grishemi të shkojmë drejt takimit me Krishtin, duke marrë pjesë në lutje e duke e
dëshmuar ditë për ditë dashurinë e krishterë. Këtë pohoi dje Benedikti XVI në lutjen
e Engjëllit të Tënzot. Bota bashkëkohore – tha Papa – ka nevojë, sidomos, për shpresë.
E shpresën mund ta gjejë vetëm në Jezu Krishtin.
Në këtë të dielë – kujtoi
Papa – nis një Vit i ri Liturgjik, që hapet me Kohën e Ardhjes, kohë e cila na përgatit
për Lindjen e Zotit. Realiteti i Vitit Liturgjik, i parë me syrin e Zotit – shpjegoi
Ati i Shenjtë – mund të paraqitet kështu: “Qendra e liturgjisë është Krishti,
dielli, rreth të cilit, ashtu si planetët, sillen Zoja e Bekuar – më e afërmja – e
më pas, martirët e shenjtorët e tjerë, që kanë arritur tashmë në qiell, ku i këndojnë
Zotit këngën e lumnisë së përsosur e ndërmjetësojnë për ne”. Por ç’rëndësi
mund të ketë realiteti i Vitit Liturgjik, për njeriun, për historinë, për shoqërinë? “Përgjigjen
na e këshillon pikërisht rruga e Kohës së Ardhjes, të cilën e nisëm sot. Bota bashkëkohore
ka nevojë sidomos për shpresë. Kanë nevojë si popujt e pazhvilluar, ashtu edhe popujt
ekonomikisht të zhvilluar. Gjithnjë më shpesh vërejmë se jemi në të njëjtën barkë
e se duhet të shpëtojmë të gjithë së bashku”. Duke parë sesi shemben siguritë
e rreme - shtoi Papa – vërejmë se kemi nevojë për një shpresë të besueshme. E këtë
shpresë mund ta gjejmë vetëm në Krishtin: “Zoti Krisht erdhi në të
kaluarën, vjen në të sotmen e do të vijë në të ardhmen. Ai i rrok të gjitha përmasat
e kohës, se vdiq e u ngjall, se është ‘i Gjallë e, ndërsa ndan me ne pasigurinë njerëzore,
mbetet përgjithnjë Zot e na jep sigurinë e vetë Zotit. Është prej mishi e gjaku si
ne, e është shkëmb, si Zoti”. Kushdo që ka etje për liri, drejtësi e paqe
– vërejti Papa – mund të ringrihet përsëri në këmbë me kokën lart, sepse me Krishtin
çlirimi është fare pranë: “Jezu Krishti nuk u përket vetëm të krishterëve,
e as vetëm besimtarëve, por të gjithë njerëzve, sepse Ai, që është qendra e fesë,
është edhe themeli i shpresës. E për shpresë ka nevojë të përhershme çdo qenie njerëzore”. Pas
lutjes së Engjëllit të Tënzot, Papa kujtoi se më 1 dhjetor do të kremtohet Dita botërore
kundër Sidës. Mendimi i Atit të Shenjtë shkoi tek të gjithë njerëzit e prekur nga
kjo sëmundje: “Kisha përpiqet me të gjitha forcat për ta luftuar Sidën, përmes
institucioneve të saj e personelit të tyre. I nxis të gjithë të ndihmojnë me lutje
e vëmendje konkrete, në mënyrë që njerëzit e prekur nga Virusi HIV, ta ndjejnë praninë
e Zotit, që dhuron ngushëllim e shpresë. Uroj, në fund, që duke i shumëfishuar e duke
i koordinuar përpjekjet, të arrihet në ndalimin e në zhdukjen e kësaj sëmundjeje”.
Porosia e fundit e Papës në lutjen e djeshme të Engjëllit të Tënzot drejtuar
besimtarëve, ishte të ulen në shkollën e Virgjërës Mari, sepse Ajo mishëron plotësisht
njerëzimin, i cili jeton me shpresën, që ngrihet mbi besimin në Zotin e gjallë. Pastaj
Benedikti XVI përshëndeti të gjitha ata, që morën pjesë në marshimin, organizuar nga
Lëvizja e dashurisë familjare, kushtuar shprehjes së dashurisë për Kryqin, duke ia
njohur thellësisht vlerën fetare, historike e kulturore. Me këtë rast, në Sheshin
e Shën Pjetrit, u lartuan mijëra duar, që mbanin Kryqe të të gjitha formave, duke
treguar kështu se Simboli i krishterimit është në qendër të jetës së mijëra njerëzve
nga mbarë bota!