Nuk shuhet jehona e takimit të Papës me artistët: koment i historianit të artit, Timoti
Verdon
(24.11.2009 RV)Nga gazeta “Nju
Jork Tajms” deri te televizioni “Al Zhazira”, takimi i Benediktit XVI me artistët
në Kapelën Sikstina në Vatikan zgjoi një interes të jashtëzakonshëm në nivel botëror.
Të shtunën e kaluar, Papa tregoi se sa potencialitet ka lidhja e ngushtë ndërmjet
fesë e artit. Ati i Shenjtë e përfundoi fjalimin e tij duke u kërkuar artistëve të
mos frikësohen nga feja, pasi ajo nuk i heq asgjë artit dhe gjeniut të tij, por i
ngre më lart dhe i ushqen. Mbi këtë thirrje plot pasion kërkuam mendimin e historianit
të artit, imzot Timoti Verdon, i cili ka publikuar kohët e fundit librin “Arti në
jetën e Kishës”: Si artistë e pra si njerëz që kanë marrë dhuratë nga Zoti
një talent të madh, edhe ata janë burra e gra që, si të gjithë, i bëjnë vetes pyetjet
thelbësore të jetës e duhet t’i bëjnë, si ne të gjithë, mbi bazën e një vizioni të
caktuar feje e shprese: shpresa, arti si shprehje e shpresës, vepra e artit që duhet
të përçojë shpresë. Papa i fton artistët të mos ia mbyllin dyert e jetës, të përvojës,
të zemrës ë tyre nevojës për fe e shpresë, që të mos kenë frikë se nëse i afrohen
Zotit dëmtohet arti e talenti, të cilin e ndjejnë me forcë brenda vetes. Papa
nënvizoi qartë edhe se bukuria nuk mund të ndahet nga e mira e pra, edhe nga e vërteta… Ati
i Shenjtë përvijoi një dallim shumë të qartë ndërmjet bukurisë së vërtetë, që ia hap
zemrën njeriut ndaj lirisë, shpresës, e asaj bukurie të rreme, që shndrit, tërheq,
por që e burgos zemrën duke e detyruar t’i shërbejë pushtetit të kësaj bote: fëlligështisë,
etjes për pushtet e për pasuri. Ati i Shenjtë nguli këmbë që artistët të jenë të lirë
të zgjedhin ndërmjet njërës e tjetrës, pikërisht para pikturës së famshme të Mikelanxhelos
“Gjykimi i Mbramë”. Pra, u foli këtyre personave, që në një farë kuptimi gëzojnë liri
të veçantë, e para “Gjykimit të Mbramë” i ftoi ta përdorin mirë këtë pushtet. Ta përdorësh
mirë do të thotë të punosh që personat të shohin, të dëgjojnë, të provojnë para arteve
vizive, muzikës, letërsisë, gjithçka është e mirë e jo të keqen. “Arti në
jetën e Kishës”: kështu e ka titullin libri juaj i fundit. Jo vetëm në takimin e së
shtunës me artistët, por edhe herë të tjera, Benedikti XVI ka folur për marrëdhëniet
ndërmjet artit e fesë, duke përmendur të ashtuquajturën “via pulcritudinis”, apo rrugën
e bukurisë… Vërtet e bukur në artin e Kishës nuk është vetëm pamja e jashtme,
piktura, skulptura, ndërtesa; vërtet i bukur është mesazhi që përmbahet në të. Një
nga problemet e artit bashkëkohor është se ndalet në pamjen e jashtme, në bukurinë
estetike, në stilin, pa marrë parasysh se në pjesën më të madhe të historisë, arti
ka qenë një mjet komunikimi, jo thjesht diçka e bukur në vetvete. Sot flitet për kompozicionin,
për hapësirat e ndërtesave kishtare pa komunikuar me ata që duan t’u afrohen këtyre
veprave, të cilat kanë pasur një funksion e ky funksion është komunikimi i së vërtetës.