Izrael-Hamas: Vijojnë bisedimet për lirimin e rreshterit Shalit. Aeroplanët izraelitë
godasin Gazën.
(24.11.2009 RV)Tani për tani nuk ka një marrëveshje ndërmjet Izraelit dhe Hamasit
për lirimin e rreshterit Xhilad Shalit kapur në Gazë në 2006, por nëse do të ketë
një marrëveshje atëherë qeveria izraelite do të hapë një debat publik përpara se të
vendosë. Lajmin e dha sot kryeministri izraelit Beniamin Netanijahu gjatë një
vizite në shtatmadhorinë e policisë në Jeruzalem. Gazeta arabe Al Shark Al Ausat njoftoi
se bisedimet për lirimin e rreshterit izraelit në këmbim të një mijë të burgosurve
palestinezë pothuajse ka përfunduar. Po ashtu Izraeli është gati të lirojë udhëheqësin
e Frontit Popullor për Çlirimin e Palestinës Ahmad Sadat si edhe kryetarin e Fatahut
për Cisjordaninë Marvan Barguti. E ndërsa bisedimet për këmbimin e të burgosurve
vijojnë sot aeroplanët gjuajtës izraelitë goditën tre objektiva në Rripin e Gazës
si përgjigje ndaj dy raketave lëshuar kundër territorit izraelit. Sulmet ajrore shkatërruan
dy tunele në Rafah, në kufi me Egjiptin si edhe një ofiçinë në afërsi të qytetit të
Gazës. Sipas burimeve mjekësore, tre palestinezë mbetën të plagosur nga këto sulme.