(24.11.2009 RV)Sot në Vietnam,
në solemnitetin e Martirëve vietnamezë, në So Kien, në kryedioqezën e Hanoit, ku qe
shuguruar katedralja e parë e vikariatit apostolik të Tonkinit, u hap Viti i Shenjtë
i Vietnamit. Kisha e Vietnamit është një Kishë martire që shikon me shpresë
të përtërirë të ardhmen: me një procesion prekës të ndriçuar nga mijëra e mijëra qira
të bartur nga besimtarët dhe me Meshën solemne në të cilën bashkëkremtuan me dhjetëra
ipeshkvij e qindra meshtarë e rregulltarë, u hap në Sio Kien Viti i Shenjtë i Kishës
martire të Vietnamit. Një ngjarje e rëndësishme që përqendrohet mbi temën: “Kisha
katolike në Vietnam: misteri, njësimi, misioni”. Kardinali i Vendit hirësia
e tij Gjon Man, kryeipeshkëv i Hokiminhit Ville, tha se qëllimi i këtij viti jubilar
është: përforcimi e ndarja e përbashkët e fesë me të tjerët, promovimi i pjesëmarrjes
së laikëve në ndërtimin e Kishës së gjallë vietnameze, si dhe përmirësimi i marrëdhënieve
me qeverinë. “Ne nuk kemi shkolla katolike, por duam që familjet, bashkësitë
e shoqatat të bëhen ‘shkolla feje e dashurie’ - shpjegoi kardinali Man. Kujtojmë se
sivjet në Vietnam festohet edhe 350 vjetori i lindjes së dy vikariateve apostolike
në Tonkino e Koçinçina si dhe 50 vjetori i themelimit të hierarkisë kishtare në Vend.
“Gjatë këtij Viti të Shenjtë - nënvizoi kardinali Man - i drejtohemi të rinjve e familjeve
në mënyrë që popullsia e të dijë çka do të thotë për të krishterët të jetosh ‘sipas
fesë’: jo një konflikt apo një luftim për pushtet e për pasuri, por të jetosh në të
vërtetën e në dashurinë e Krishtit. Kështu mund të kuptohet e të vlerësohet kontributi
që Kisha ofron për të mirën e përbashkët të popullsisë e të kombit”, përfundoi kardinali
vietnamez Man.